ILP check-na dah thar ngen

ILP check-na dah thar ngen
Mizo Students’ Union chuan Sihhmui leh Phunchawng inkarah inner line permit (ILP) check point dah turin Home minister an ngen a. Serkhan-ah pawh ILP check point dah an ngen bawk.
MSU Gen. Hqrs hruaitute chuan Home minister K Sapdanga an hmu a, Mizoramah Sairang thlenga rel a lo luh tak avanga hnamdangten min chim nasat dawn avang leh Mizo mipui kan him tlan zawkna atan ILP checkpoint thuam chak a, tih changtlun a nih theihnan hma la turin an ngen.
Sairang thlenga rel lo lutah hian Sihhmuiah chauh ni lo, Sihhmui leh Phunchawng inkarah ILP khauh taka check a nih theihnan ILP check point siam turin an ngen a. ILP check point ni lo, a ruka lolut an awm theih venthawn thilah Serkhanah pawh ILP check point a awm theihnan hma la turin an ngen a, Home minister hian tha a tih thu leh hma lak a tum thu a lo hrilh a ni.
MSU hruaitute hian Mizoram rawn tlawh khualzinten ILP kalphung mumal leh tha zawk an neih theihnan hma la turin Home minister hi an ngen a. Khualzinmite tan bika hman theih tur ‘tourist ILP’ a hranpaa duan a nih theihnan temporary ILP kan neih mek chu ennawna siamthat a nih theihnan hma la turin an ngen.
Home minister hian tourist ILP chungchangah hian Tourism minister chu rawtna an neih theihnan sawipui a tum tih a lo hrilh.