ILP chungchangah minister-in thu belhchian dawl lo sawi – ZPM Thalai

Inner line permit chungchangah minister Dr R. Lalthangliana’n thu belhchian dawl lo a sawi tih ZPM Thalai chuan an sawi.
ZPM Thalai Hqrs. thuchhuak chuan, February 20-a Hnahthiala State Day a hmanpuinaah Dr R Lalthangliana hian Mizoram ILP chu Peace Accord hrinchhuah angin aa sawi a, hei hi thil pawmawm loh takah an ngai tih sawiin, ‘MNF ministry-a minister zingah thiamna nei sang leh tawnhriat ngah Dr R Lalthangliana’n hetianga ILP chungchang leh Peace Accord dawt thu hmanga a sawizawm hi pawi kan ti hle. Inner Line Regulation leh Inner Line Permit chungchang hi Bengal Eastern Frontier Regulation 1873 para 2-ah tarlan daih tawh a ni a, Peace Accord khan a pawlh dal zawkah kan ngai a ni,’ a ti.
MNF-in inremna neih an chak tawh lutuk a luatah ‘kan sa lu hawn tur’ tia Pu Laldenga’n keipui sa hauh taka a hauh, Mizoram ramri chungchangah pawh Boundary Committee duhdan dinpui ngam loin, ramri atana Mizo mipuiin kan pawm theih loh North Eastern Areas Reorganisation Act 1971 chu a rawn pawmpui tih ZPM Thalai hian sawi bawkin, ‘Hei hi India sawrkar laka Pu Laldenga a tlawm takzet zia tilangtu a ni,’ a ti.
Thangtharte chu duh duha bum theih kan ni tawh lo tia sawiin, ‘Zalenna sualtute ah pawh ngaihsan tur leh ngaihsan loh tur kan thliarthiam tawh a ni tih hi ZPM Thalai ngaihdan a ni a; thangtharte hian tuna MNF party hruaitute hi chu nationalist-ah kan chhiar ta meuh lo a ni,’ thuchhuah chuan a ti.