ILP sponsor leh a behbawm….

Inner Line Permit (ILP) dan siam that mek a ni a, MZP chuan home minister hnenah rawtna hlawm paruk- administrative efficiency, traveller access, digitalization, enforcement, penalty, leh sponsor mawhphurhna bakah Centralised online ILP portal siam te an thlen a. Aizawl–Sairang rel link tharah entry point lian counter tam zawk, staff training tha zawk leh diltute tan online helpdesk siam a ngaih thu an thlen bawk.
MZP thu thlente hi a pawimawh em em vek a, chutih laiin thenkhat hi chu sawrkar pawhin a kalpui mek, mahse a nihna tur anga kenkawh that lohte a ni nual hlawm awm e. Chung zinga pawimawh em em chu ‘sponsor mawhphurhna’ hi a ni.
ILP holder zinga thenkhat, permit an neihna ‘trade’ mil lo tawpa eizawng zui ta lawp lawp an awm thin. Tunhma deuh khan, ILP neih chhan trade atan ‘helper’ emaw, ‘cement mistiri’ emaw tih a nih laia kawngsira bungbel thutpuia zuar ta lawp lawp thin kha man chhuah tur an awm zut a. Chuta chhapah, an awmna hmun tur ‘area’ pela khawsa kual mai mai pawh an awm teuh thin. ILP valididty zo tawh, renew si lo, man chhuah tur an awm thin bawk. Heng zawng zawng hi ILP sponsor mawhphurhna a ni a, penalty dawng tur pawh ILP sponsor ‘Lala’ or ‘Lali’ te kha an ni. Sponsor an nih angin, anmahni hnuaia hnam dang ILP neitute dan bawhchhia an awm thin laiin, sponsor zingah penalty dawng hi sawi tur an awm meuh lo niin a lang.
Chuvangin, ILP sponsor, an mawhphurhna hlenchhuak tha lote chunga dan anga ‘action’ lak kawngah hian, tun aia khauh zawka dan kenkawh a pawimawh tih a lang a. Sponsor ten, an mawhphurhna an hlenchhuah that loh avanga penalty an dawn zat zawt chuan, ILP felhlel, man chhuah tur hi a tlem sawt ngei ang.
ILP nei lote hian an thiante an bel a, an thianten an lo thukru thin; chu chu chhui chhuah a harsa lo. ILP nei lo, lo awmpuitute chungah pawh action lak zel a nih chuan, tun ai hian dan bawhchhia an tlem sawtin a rinawm. Chutiang bawkin, ILP nei lo in luah lo luahtirtute chunga action lak theihna dan te pawh.
A pawimawh ber erawh chu, dan tha pui pui nei mah ila, a kenkawh lam bawk hi a ni kan chak lohna ber chu. Tuna ILP dan kan neihsa te pawh hi a nihna tur ang takin kengkawh thei ila, kan buai nep deuh ngei ang. Lirtheite pawh hi an kalna tur kawng zawhtirtu chu driver-te hi an ni a, driver a inthlahdah chuan ‘accident’ a thleng mai a. Dan pawh a kawng zawh tura khalhtu chu dan kengkawhtute hi an ni a, Dan driver an ni ber ang chu.