Mayweather rematch a hmin \ep – Pacquiao

Mayweather rematch a hmin tep – Pacquiao
Hneh loh nei loa chawl ta American fighter ropui Floyd Mayweather leh boxing legend dang Manny Pacquiao-te chu kum 2015 daih tawha khawvela hmaa ‘Fight of the Century’ an chhawpchhuah tawh chhunzawmna tur ‘rematch’ puitlin tumin an indawr mek a, Filipino sawi danin inhnek nawn leh tura indawrna chu Mayweather camp lamin an pawm thei tep tawh!
Inveng chunga chak thiam Mayweather laka a tlawmna kha boxing hmuhnawm ber chi nena tumpuite hnek mial mial thin Pacquiao tan professional fight tum 73 a hmachhawn tawha vawi riat a tlawm zinga pakhat niin, American nen hian hruihrual chhunga intawn leh ngei a duh a, a chawlh tawhna atanga Floyd Mayweather kohchhuah leh tumin rei ngial a bei tawh a, a hlawhtling hnai ta niin a lang!
Multi-weight world champion ve ve intawn tum khan round 12 an khelh zawhah unanimous decision hmangin
Mayweather a chak hram a; inhnek zawhah Pacquiao chuan kum 2018 khan BBC hnenah dar hliam nei ru reng chungin kha inhnek lian kha a hmachhawn tih a sawichhuak a; kha tlawmna avang khan thlamuangin boxing a chawlhsan thei ta reng reng lo tih a tarlang tel!
Kum 46-a upa ni ve tawh Asian fighter ropui ber tih ngam hian kum 2021 khan boxing a chawlhsan thu puang bawk mah se chu mi kum vek July thlaah WBC welterweight champion Mario Barrios hmachhawn turin ring chhungah a kirleh nghal mai a, inhnehtawk (majority draw) avangin Filipino chu a chak zo ta chuang lo a, Barrios chuan a title thap a humhim.
Professional bout em chu hmachhawn lo mah se hneh loh nei lo (undefeated record)-a kum 2017-a a chawlh hnu khan Mayweather pawh exhibition bout khelin hruihrual chhungah a inlan chho deuh zut tho a; tunah kum 48 mi ni tawhin, nakkum hian Mike Tyson nena inhnek turin ruahmanna peih fel leh tawh a ni nghe nghe – sum siamna tur leh bawk!
American laka a chak loh avanga muanga chawl thei lo Pacquiao pawh Mayweather hmachhawn nawn leh tur hian a beidawng duh bik lo a, Las Vegas ngei maia rematch khel turin Mayweather camp a dawr chho zel a, a elpui tur lamin an remti tep tawh tih thu lawmawm puan tur a nei chho ta a ni!
Seconds Out hnenah he thu hi Filipino chuan sawiin, “Kan inhriatthiamtawn danin a hril dawn a; tunah hian ka mite leh a mite an indawr kal mek a; he rematch hi kan puitlin thei ngat a nih chuan khawvel hian a tuipui leh dawn em mai.
“Mike Tyson nena inhnek tura thutlukna a lo siam tawh kha chu keia dan phak rual a ni lo,” tiin amah nena intawng lo zawnga Mayweather-a’n boruak lian a siam tur chungchang a tarlang tel.
Kum 59 mi heavyweight champion hlui Tyson leh Mayweather-te’n khawvel hmaa exhibition fight an chhawpchhuah tur hi nemnghet tawh mah se nakkum thal lai tih bak chu a hun leh ni dik tak ruat a la ni lo.
Kum 2015-a ‘Fight of the Century’ an tih mai boxing inhnek ngaihven hlawh zeta hliam nei ru chunga a inkhelh chungchang tarlang tel chungin Pacquiao chuan, “Kan rematch beisei mek phurawm zualna chu tun dinhmuna dar hliam ka nei ta lo hi a ni,” tiin dam leh dam an inhnek hun tur a thlir!