In-chiah-hneh

Mizoram State AIDS Control Society (MSACS) leh School Education Department thawh dunna hnuaiah private middle school, high school leh higher secondary school zirlaite zinga HIV/AIDS darh zel tur leh ruihhlo hman sualna venna tura Adolescent Education Programme (AEP) kalpui mek a ni a. He programme hnuaiah hian zirtirtu training zo tawh ten, HIV/AIDS leh ruihhlo laka zirlaite an fihlim theih nan hma an la chhunzawm dawn a ni.
HIV/AIDS leh ruihhlovin Mizoram a chiah hneh tawh dan hi chu kan hmuin kan hre vek tawh. Ruihhlo chungchangah phei chuan, khawpui khawlai, bazar leh kawngdungah te ualau taka hman (zawrh leh inchiu) a ni tawh a, ruihhlo avanga thi an pung zel bawk a. Chutih rualin ruihhlo man chhuah pawh a ni telin a tam tial tial bawk. HIV/AIDS lah, India rama a hluar berna state kan ni mek bawk a. Chhia zawng zawng hian Mizoram hi a bawm ta mai emaw tihturin kan awm mek niin a lang.
Ruihhlo ngaite hi naupang te tein an boral a, an pung zel a nih bawk si chuan, tuna kan thalai, zirlai rualte hi a target group chu an ni ta mai a; tuna AEP kalpui a ni pawh hi thil tihawm tak a ni.
Hetih rual hian, thahnemngaihna thuk tak nena AEP hi kan kalpui theih erawh a pawimawh dawn. Zirlaite bengah hian HIV/AIDS leh ruihhlo that lohna leh hlauhawmna, a nghawng thatloh dante hi a rik nawn tlut tlut a, a in-chiah-hneh hle a ngai takzet tawh. Kawng hrang hranga hmalakna dangte nena a inkawp bawk chuan, naupang thanglaite rilruah hlauhna, duhlohna, huatna a intuh ang a, chu chuan awmzia thui tak a nei em em ang.
|anrual a pawimawh. Chhungkua a pawimawh ber a, chhungkua atanga hmalak hleih theih loh pawh zirna in lam leh khawtlang (YMA/VC/LC) bakah kohhran thlengin hma lak zui zel a tul. Hei hi tihtakzeta mutmawh hnarmawha kan neih loh chuan, tun dinhmun hi kan dinhmun tur a ni reng ang a, a chhe tulh tulh bawk ang. Ruihhlo do beihpui hi kan thlak mup mup a ngai. Ruihhlo hi sual dang hring chhuaktu a ni a, ruihhlo a rem chuan thildang a kaihhnawih (HIV/AIDS etc) pawh a kiam ve maiin a rinawm.