Congo-in US puihna a dawn tihtawp tuar na

US-in DR Congo hnena puihna a pek thin a tihtawp chuan nghawng a nei na hle tih he rama UN thuneitu sangin a sawi.
Bruno Lemarquis-a hian DR Congo hi nikum chhunga US-in mihring puihna a pek dawng tam ber niin tanpuina a dawn thin 70% chu Washington atanga pek a nih thu thuthar lakhawmtute hnenah a sawi.
US President Donald Trump-a’n ram danga puihna a pek thin a tihtawp tak chu chu ‘mangangte innghahna ber’ a nih thu Lemarquis-a chuan a sawi.
Hetianga US-in puihna a titawp hi Rwandan thlawp M23 hel leh DR Congo-a sipaite inbeihna a nasat lai leh nunau puih ngai an tam lai tak a ni.
Thla hmasaa inbeihna a chhuah hnuah mi 7,00,000 chuangin an in an chhuahsan phah tawh.
Thla hmasaa M23-in an lak, Goma khawpuia chengte chuan khawsak a harsa hle a, damdawi inte pawh hliamin a khat vek niin an sawi.
Tuihri leh mpox a len mai pawh Goma-ah hian a hlauhawm hle niin Lemarquis-a chuan Thawhlehni khan a sawi.
Thil man a san mek karah mi chengten ei tur an mamawhna a zual zel a, agency tam tak chu US puihnaa an inngah laiin anni hian an titawp a ni.
“Kan inngahna ber, US puihna a tawp avang hian programme tam tak tihtawp a ngai a. A emergency tak zet a ni,” tiin Lemarquis-a chuan a sawi.
Khawvela ram dang puihna pe chhuak tam ber, US-ah Trump-a’n president pisa a luah leh tan chiahah ‘America First’ policy a kalpui dawn avangin ram dang a puih thin dan chu ennawn a ni dawn a, chawlhsan turin a ti nghal.
Trump-a sorkar hian ram danga puihna pe chhuaktu lian ber, USAID chu a bitum deuh ber niin an sum hman chu sawi fiahna awm lo khawpa tam niin an sawi.
US ber a chawlh avang hian khawvel pumah programme tam tak a buai phah a, mi puihnaa thawk pakhat phei chuan ‘mi puihna thila lirnghing na tak ang’ a nih thu a sawi hial.
HIV darh zel tur beitu lian, Pepfar pawh a tuar na ber zingah an tel a. “Program khar a ni a, service a tawp,” tiin USAID-a Global Health Assistant Administrator ni thin, Dr Atul Gawande chuan a sawi.
An damdawi inin HIV kai mi maktaduai 20 a buaipui thinte a nghawng niin a sawi.
Trump-a thupek avang hian Syria-a raltlante awmna, al-Hol displacement camp-ah chuan tui, inthiarna leh venhimna thil a kal thei lo vek bawk.
US atanga damdawi lama puihna dawng nasa, Afghanistan pawhin a tuar hle a. USAID puihnaa kal doctor pakhat chuan an team-a mi 60 chuang – midwife, nurse leh doctor tam tak chu hna an kal lo nghal tih a sawi.