In inkar a \hat chuan…

In inkar a that chuan…
Nupa emaw inngaizawng emaw te inkar boruak hi a kal fuh em tih hriat theih dan a awm niin relationship lama mithiam te an sawi a, tun tumah hian in inlaichinna boruak a tha nge tha lo tih hriat theihna tur kawng hrang hrang kan rawn tarlang dawn a ni. Kawppuite emaw ngaihzawng te emaw nena kan inkar boruak hi eng nge maw a an chiah le tih hi mahni a inhriatthiam loh chang a tam ve thin a, kan inkar hi a tha nge tha lo tih inhriat theih hi a pawimawh khawp mai. Kan inlaichinna hi a kal fuh vak lo a nih chuan a siamtha turin tan lak dan tur kan thiam theih phah dawn a, a lo kal fuh viau a nih pawhin chutiang tura vawn nun reng dan tur kan hriattheih phah dawn a ni.
1. In pahnih inkarah in-frank dun hle a nih chuan in inlaichinna a kal fuh viau tihna a ni. Inngaihzawn hlimah chuan thil sawi sual leh chet sual palh te kan hlau a, sawi tur leh sawi loh turah te kan fimkhur em em a, chet dan tur thlengin kan finkhur ru hle thin. Chutiang boruak chu intawn tirh, inngaihzawn tantirh lam, inhrechiang tura kan inbelhchian lai vel boruak a ni thin. Hetiang hunlai hi chuan kan nihna anga lang phawng phawng hi kan tam vak lo, kan inthup ve hle thin a, a tha thei ang bera lan kan tum thin. Mahse, kan kawp/ngaihzawng rei ve viau tawh hnuah pawh kan pahnih inkarah kan fimkhur em em reng a la ngai a nih chuan inlaichinna a fuh tehchiam lo tihna a ni duh hle. Kan kawppui/ngaihzawng te chuan min judge dawn lo tih hriatchian tawh hnuah, engkim kan inpawh tawn em em tawh hnuah chuan an bulah kan frank thin.
2. I ngaihzawng chuan a chhungte nena in inhmelhriat theih dan tur kawng a zawng tawh a nih chuan in inkar boruak a tha tihna a ni. Mi tam zawk chuan kan ngaihzawng te hi an duh hle a, an kawppui atan pawh an iai lo a nih ngawt loh chuan an chhungte nena inhriattir hi tul an ti vak lem lo. Chuvangin, a chhungte nen inhmlehriat tha tawh viau a nih chuan in inzawmna kha a nghet tha hle tihna a ni.
3. In zin dun tawh em? Ngaihzawngte nena zin dun tawh ngat hi chuan kan inkar a tha viau tihna a ni. Hetia zin dun hi inhriatchian lehzualna hun tha te a ni nghal a, a duh leh duh loh zawng te, a chetdan leh awmdan tam tak hriattheihna remchang a ni bawk.
4. A bulah nalh loh i hlau tawh lo a nih chuan i inkar a tha hle tihna a ni. In inhmuh dawn avanga inchei vul deuh chuk reng a ngai tawh lo a, engtiang pawhin awm la a bulah i confi tawh a nih chuan in inkar a tha a, a mit la tura thawmhnaw nalh hak kher a ngai tawh lo tihna a ni. I thawmhnaw hak azirin a bula awm nuam leh nuam lo tih lam boruak a awm tawh lo. Chutiang ni lo va, a bulah chuan nalh taka awm reng a ngai a, i inchei nalh loh chuan nuam i ti lo va, a hmuh dan che a dik lo ang tih hlauhna nen i hun i hmang a nih chuan in inlaichin dan kha a fuh lutuk lo tihna a ni ang.
5. A bulah ‘aih’ tih i hreh tawh lo a nih chuan in inkar a tha tihna a ni. Tih lawm loh hlauh vanga i duh vak loh pawh i hnial hreh boruak ang kha in ngaihzawn rei tawh hnuah pawh a reh thei lo a nih chuan i inkar a tha lutuk lo tihna a ni. I hman loh chang emaw, i duh loh zawng emaw tih pui che a tum pawhin, awlsam takin ‘aih’ tiin i hnial mai thei tawh a, inngaihtuah buai vak a ngai tawh lo a nih chuan in inkar a tha tihna a ni.