In inkar chhe tawh engtin nge i siamthat ang

Inngaihzawnna emaw nupa nunah emaw hlim taka awm reng theih a ni bik lo. Inhauh leh intihthiam loh chang a awm thin a, boruak pawh a tha reng thei bik lo a, kan inkarin tlakchhiat lam a pan lai te pawh a awm thin a, chutiang hunah a inkhai chhuah leh dan thiam apiangin an vannei a, an boruak an siamtha leh thei thin. In pahnih inkar chu a chhiat zual zel hmain hma i lak a ngai a, ngawi reng a i en ringawt chuan a liampui mai dawn che a, chuvangin a kehchhiat tak tak hmaa eng emaw i tih a tul a ni. Tun tumah hian relationship lama mithiam ten inkar a chhiat deuh a, a kehchhiat tak tak hmaa siamthat leh dan tha ni a an sawi te kan rawn tarlang e.
1. Titi leh rawh u. Hmanah chuan engkim chipchiar takin insawi dun thin kha! Khatiang deuh khan thil ho te te pawh sawi dun tam leh tum rawh u. Mahse, boruak a that vak tawh loh sa bawk si chuan sawi tur thlan thiam a pawimawh a, lungngaihna leh hrehawmna, thil hriat nuam lo lam aiin, a hlimawm leh lawmawm lam sawi dun tam in tum dawn nia. Inngaihzawnna emaw nupa nun emawah hian a pakhat zawkin hlu ve tawk lo emaw, zah kai ve tawk lo emaw, a thusawi te ngaihpawimawh sak hlawh ve lo emaw anga inhriatna a neih chuan boruak a chhe awlsam thin. In thusawi te inngaihthlak sakin, titi dun leh tum rawh u. Hetianga han titi dun leh tan tur hian a bul tan dan tur i haichham deuh a nih chuan, in hun kaltawh, thil hlimawm tak intih te kha han sawi chhuak leh la, tichuan sawi tur a rawn indawt chho zut tawh mai ang.
2. Thil kal tawh chu liam tir tawh rawh u. Intihthiam lohna leh lungawi lohna in lo neih tawh te kha inngaidamin, theihnghilh tum tawh rawh u. In pahnih inkar tlachhe mek tungding leh tuma tan lak lai chuan hun kal ta a intihthiam lohna te sawi chhuah leh khan rah tha engmah a chhuah dawn lo. Hetianga hun kaltawh boruak tha lo phawrh chhuah leh hi inpahnih inkar tihchhiat belhchhahna awlsam ber pawl a ni zawk ang. Sawi chhuah tawh loh mai bakah theihnghilh daih tum kha a tha ber. Hun kaltawh ami chu hun kal tawh khan liam pui tawh rawh se.
3. Nitin hi a inang vek thei lo a, chutiang bawkin i kawppui chu nitin in intawn tirh anga awm reng turin beisei bik suh. In pahnih inkarah khan engtin pawn awm ula ngaihthatna neih tawh chin kha a awm ve a, chu chu a lo nasa ve telh telh thin. Chutih hunah chuan thil reng reng ngaia neih leh a nih dan tur ve reng anga ngaihna te a lo awm tan thin a, chu chu a thinrim leh âng zawnga sawi chuak lovin, mahni tawka thutlukna siam nghal mai lo va, a zaidam leh dawhthei zawnga sawichhuah thin tur a ni.
4. Kan hmangaihte lakah chuan kan thikthu te hi a chhe duh khawp mai tih hriat tur. I kawppui chu midang laka a chetzia leh i bula a awm dan te khaikhin mai chin te pawh a awl ang a, mahse, hei hi tih loh tur a ni. A dinhmunah indintir la, a thlirna tlang atanga thil thlir thiam tum la, nang ni ta la engtin nge i tih te ngaihtuah chhin teh. In pahnih inkara a tha lam kha ngaihtuah thin la, tichuan engtia tih tur nge i hrethiam thin ang.
5. Taksa inkhawih fo hi a pawimawh. Hetia tih vanga engtik laia inkuah emaw in khawih neuh neuh reng emaw lam a ni lo. In chhuahsan dawn a han inkuah zuai te, in-chuks zeuh te hi a tangkai em em a ni. Hetihrual hian a chhan em em pawh awm chuang lo a in-kuah te hian i kuaha chu a tihlim veng veng thei tih hre reng ang che.