Eminem-a’n hla tharah Greatest Rappers List-ah a rank chungchang a chham chhuak

Rapper-te hian an hla hmanga mi an kah deuh zauh zauh leh an lungawi lohna thu han chham chhuah te hi an thiam zawng tak a ni a, Eminem pawhin a hla hrang hrangah hetiang kawnga a themthiam zia hi a lo tarlang fo tawh a, tuna a hla thar ‘Tobey’-ah pawh hetiang hi kan hmu leh ta. ‘Tobey’ hla hi tun nipui chhunga a album thar tlangzarh tur ‘The Death of Slim Shady’ atanga a single pathumna a ni.
‘Tobey’-ah hian Billboard-in nikuma Greatest Rappers of All-Times list-a No.5-a an dah chungchang a chham chhuak a, ani aia a dah hniam zawkah a chungah an awm a ni ngei ang, Eminem chuan, “But this to me, is a mystery/ How rappers I’ve already ripped could be higher up on a list than me/ Yet I sit here on your list that went five, wished it was fine, but just know inside/ To me that s–t’s hilarious,” a ti. (A mak chu ka ti, rapper ka ben hrep hnu te pawh list-ah ka chunglamah an awm a, kei 5-na ka ni lawi si hi a tha thawkhat e, tih ka tum nain, ka nuihsawh ve deuh sia, a tihna a ni ang e!)
Eminem hian tu chungchang ber nge a sawi tih erawh a hriat loh a, Billboard Greatest Rappers of All-Time list-ah hian 2Pac, Nas, Kendrick Lamar leh Jay-Z te top four-ah an awm a, an zinga tute emaw hi chu amah aia nau deuhah a ngai a ni ngei ang.
Melle Mel-a’n he list top 5-a Eminem lang ve hi The Art of Dialogue interview-a a sawisel chiam mai a, Eminem hi mingo a nih vang maia list-ah hian top 5-a awm thei ni a a ngaih thu a sawiin, “Rapper tha ve tak chu a nia lawm. Hralh tam lama pawh midang a khum vek. Rhyme style kan tih pawhin, a tha e, rhyme style a nei alawm. Mahse, mingo a nia. Mingo a nih hi. Chuan maw, Eminem hi keini anga a tu mihang emaw ni ve se chuan, amah ang tluka rhyme thei te 35-na an nih laiin kha list-ah khan top 5-ah a awm bik dawn em ni? 35-na tur a ni. Mingo a nih vang mai mai,” a ti.
Hei hi Eminem hian chhang letin, Tobey hlaah hia, “So when I get dissed though and by a pioneer/ Who was one of the reasons why I’m here/ They tell me I should just let that s–t go and slide/ ‘Melle Mel shouldn’t get no reply, that man is a legend’/ B—h, so am I,” tiin nalh takin a chhang let (a sulsutu zinga miin min kap a, amah chu hetiang ka thlen theihna chhan i a ni lehnghal. Melle Mel te ang duang chu chhang let lova ngawih san mai turin min ti a, a ni chu legend a nia. Biangno, kei pawh ka ni ve tho, a tihna a ni ang e!).
Eminem album thar tur ‘The Death of Slim Shady’ hi a studio album 12-na tur a ni a, 2020-a a album ‘Music to Be Murdered By’ hnuah a album tihchhuah leh hmasak ber tur a ni. Eminem hian Billboard 200 chart-a No.1 kai thei album 10 a nei tawh a ni.