Inbiak chauhvin buaina a ching fel thei – Manipur police chief
Inbiak chauhvin buaina a ching fel thei – Manipur police chief
Manipur police chief Rajiv Singh-a chuan an state-a chi leh chi inkara intihbuaina amw mek chu muanawm taka inbiakna hmang chauhva chin fel theih a ni tih a sawi.
Imphal-a Pathiannia 134th Raising Day an hmannaah DGP Singh chuan, “Tun hi hun khirh tak a ni a; mahse, kan chakna awm zawng zawngin kan bei mek a, mi tin kan thawhpui bawk,” a ti.
“Muanna leh nunphung pangngai kan duh a, a rang thei ang bera a awm theih nan kan harsatna tawh mek hi a rang thei ang bera chin fel pawh kan duh a. Nunphung a buaiin thil chhia pawh a tam a; mahse, kum khat leh a chanve liam ta kan thlir let chuan, ziaawm lam kan pan hle tawh a ni,” a ti.
“Tharum thawhna, thihna leh hliam tuar zat an tlahniam a. Rawng tak taka chea thil hal leh silai ri hriattur a la awm a; mahse, venhim hna thawktute kan inring a, hetiang hi a thlen tawh lohna turin kan tang a ni,” a ti.
“A khai lam ve ve pawh lo pen chhuaka inbiak tum turin ka ngen a. Buaina chin fel dan awm chhun chu hnam hnihte hi muanawm taka an inbiak chauh a ni,” tiin DGP chuan a sawi.
Manipur Police-te chu civil mite tana pan nuam an nih thu a sawi bawk.
1st Manipur Rifles parade ground-a hun hmanah hian Singh-a chuan, “Dan lova silai kawl 3,014 leh a mu 30,000 hai chhuah tawh a ni a, dan lova silai kawl 1,000 chuang leh a mu 15,000 chuang venhim hna thawktute hnenah kum khat kal ta chhung khan hlan a ni bawk,” a ti.
Kum liam ta chhungin IED 445 leh hand grenade 809 hai chhuah niin National Security Act hnuaiah hel 29 man an ni bawk tih a sawi.
Tar lan tawh thin angin Manipur-ah hian phaizawla cheng, Meitei leh tlangrama cheng, Zo-Kuki inkarah May, 2023 atang khan buaina a chhuak a. Mi 260 chuang thi awm tawhin chenna in chhuahsana tlanchhia mi sang tel an awm.
Mi tam tak chu haw leh tawhin boruak sa zualpui chu a reh tawh a; mahse, hnam hnih inkarah inremna tak tak a la awm loh avangin thil duhawm lo la thleng thei reng a ni a. Mipui thlan sorkar chu thiah lailawk niin President’s Rule hnuaiah an awm mek bawk a ni.