Inbiak tumna karah Israel leh Hezbollah inbei zel

Inbiak tuma hmalakna kal mek karah Lebanon chhim lam leh Israel hmar lamah Israeli sipaite leh Hezbollah chu nasa takin an inbeih chhunzawm.
Lebanon health ministry chuan March 2-a Hezbollah-ten Israel an bei hnua indona a chhuah atang khan Israeli-te chetnaah mi 2,055 an thi tawh a, Zirtawpni atang khan mi 167 an thi niin a sawi a. Hemi hun chhung vek hian Israel sipai 12 leh civil mi pahnih Hezbollah-in a that niin Israel thuneituten an sawi ve bawk.
US leh Iran inkara inkahhai kalpui a nih hnuah pawh inbeihna hi chhunzawm zel a ni a, Israel chuan Lebanon-a an beihpui thlak hi inkahhaiin a huam lo niin a sawi.
Lebanon, Israel leh US thuneitute chu Thawhlehni hian Washington-ah an inbe dawn.
Pathianni khan Lebanese Prime Minister Nawaf Salam-a chuan indona chhunzawm zel ni mah se tihtawp tuma hmalak zel a nih thu a sawi.
Television-a thu a sawinaah, “He indona hi tihtawpa kan ram atanga Israel inhnuhdawh theihna turin kan bei dawn a ni,” a ti a. “Hmalakna kan chhunzawm zel a… inbiakna hmanga indona tihtawp tum a ni,” a ti.
Hetihlai hian Israeli Prime Minister Benjamin Netanyahu-a chuan Lebanon chhim lam beitu a sipaite a tlawhnaah nasa takin a la fuih.
Israel hian a hmain Lebanon ram chhunga km riat atanga 10 vela thuk security buffer zone tia a sawi a siam a, hei hi Hezbollah beihna laka Israeli-te venhim nan a tul thu a sawi.
Pathianni khan Lebanon chhim lam khaw tam tak chu Israeli thlawhnain nasa takin an bei a, heng zingah hian kum 2006-a Israel leh Hezbollah indonaa nasa taka inbeihna hmun, Bint Jbeil pawh a tel.
Israel Defence Forces (IDF) chuan sipaite hian Bint Jbeil-a damdawi in compound-a awm Hezbollah fighter 20 chuang an that tih an sawi.
Lebanon health ministry chuan a dik loh thu sawiin Israel chu civil mite leh damdawi in hmun beiah a puh.
Kar tawpa inbeihnaah hian Lebanon Red Cross chhanchhuaktu pakhat a thi a. An pawl hian an team-te chu mi puih hna an thawh laiin ‘Israeli drone-in a fuh’ tih an sawi a. Hei hi tun hnaia Red Cross volunteer thah vawi hnihna a ni.
Lebanese thuneitute chuan indona chhuah atanga Israel-in beihpui a thlaknaah chhanchhuaktu leh damdawia thawk 80 chuang an thi tawh niin an sawi.
United Nations Interim Force in Lebanon (Unifil) pawhin Israel sipaite nena an inkah thu an tar lang bawk a, Israeli tank-ten an lirthei pahnih an kap a, chhiatna a thlen thu an sawi.
Indona avang hian civil mite tawrhna a pung zel a, Lebanon-a cheng mi maktaduai 1.2 vel chu hmun himah an insaseng a, Israel hmar lamah pawh mi sang tam tak an tlanchhe bawk.