Inbra a chawl ve ta

Fotballer hriat hlawh, player luhlul leh maksak Zlatan Ibrahi-movic chuan kum 41 mi niin football a chawlh-san.
Pathianni zana Italian Serie 2022-23 match hnuhnung ber khelh a nih tum khan San Siro-a mipui pungkhawm hmaah football a chawlhsan thu a puang a. “Mangtha tiin Football ka thlah a ngai ve ta. Mah se, nangni erawh chu mangtha tia ka thlah hi in ni ve lo. Milan tan kan rawn khelh hmasak tum khan hlimna min pe a. Ka rawn zawm vawi hnihnaah hmangaihna min lo pe thung. Lawm takin min kuangkuah a, mahni in ang maiin min tlangneltir a, ka dam chhungin Milanista ka ni reng tawh ang”, tiin football a chawlhsan thu leh Milan chunga a lawmna luangliam a sawi chhuak.
Forward goal thun thei, a khelhna apianga player langsar ni fo thin Ibrahimovic hian Swedish club Malmo FF-ah kum 1999 khan bul a tan a. Kum 2001 khan Netherland club lian Ajax a zawm a, Ajax hi khawvelin Ibra a hriat lar tanna a ni. Ajax atang hian Italian club lian Juventus a zawm a, hemi hnu hian club lar tak tak; Inter Milan, Barcelona, AC Milan, Paris St-Germain leh Manchester United tan a khel a, a khelhna apiangah player langsar a ni thei zel. A uaithlak ve deuh hnuin USA lamah a kal a, LA Galaxy tan a khel a, hemi hnu hian AC Milan-ah a kir leh a, AC Milan atang hian football a chawlhsan zui ta a ni.
Ibra hian club hrang hrang tan goal 511 a thun tling a, ram hrang hrang pali-ah league champion a ni tawh bawk. Football a khelh chhungin trophy 34 zet a chawi a, heng zingah hian league title 14 a tel. Club tan a ropui bakah an ram Sweden tan vawi 122 khelin goal 62 a thun a, Sweden tan goal thun hnem ber a ni nghe nghe.