Independence Day thusawi

India Indepencence Day vawi 79-na lawmnaah PM Modi chuan minute 103 (darkar 1:43) zet thu a sawi a. India ramin independence day vawi 100-na (2047) a thlen ruala ram changkang (developed country) ni ve hman tura India ram tihhmasawnna tura beihpui thlak mek chungchang chu PM Modi-a thusawi laimu a ni a tih theih awm e. PM Modi-a thusawi atang hian, India ram chu ram dang tanpuinaa innghat lova mahnia ding nghet ve thei a nih tawh thu te, technology lamah leh economic lamah pawh mahni intodelh, mahnia nghet taka ding thei a nih ve takziate a hriat theih.
Chief Minister Lalduhoma pawhin Independence day thuchah thupui atan ‘Kalphung Thar, Mipui Sorkar’ tih hmangin thu a sawi a. A sawrkar hmalakna a tarlan tam zawk chu, tunhmaa sawrkar lo awm tawh ten an lo tih ngai loh te, an tih theih loh te a ni hlawm awm e. Hmasawnna lawmawm tak tak a ni hlawm a, kum hnih em pawh hun la hmang lo thawh atan chuan a ropui tihsak a phu viau a ni.
Mipuiin an ngaihchan pakhat, tun laia Sairang leh Vairengte inkar kawngpuia harsatna thleng chungchang pawh chief minister hian a sawifiah nual a, chutih laiin, harsatna thleng avanga mipui hnena ngaihdam dilna emaw, thuphachawina lam hawi emaw chu sawi rik a ni chiah lova, MLA rualin an vil chungchang te, NHIDCL lam hmalakna tharlamte erawh sawi rik a ni thung. Thil pawimawh tak chu, kawngpui pawimawh chinte Rigid Pavement hmanga thawh phalna central-ah dil mek a nih thu leh hlawhtlin ngei an inbeisei thu a sawi kha a ni.
Ration lak chungchang CM-in a rawn zeh zeuh pakhat hi mipui tan inenfiahna tur point tha tak a ni awm e. “Retailer thenkhatte chu mi inah kalin Kutzungpui an nemtir a, buhfai la si lovin la angin an lang ta a, chumi ai chu an hralh ru thin a. Hemi te ringawt tidik tur pawh hian tha thlah a ngaithei lo hle a, mar pat reng a ngai a ni” tiin CM hian a sawi a. Hemi chungchangah hian, thuneitu lam hian mipui hriattur pawimawh an puangzar tha tawk lo a nih theih rualin, ‘buhfai la si lova, la anga kutzungpui nem’ lai tak hi thil dik lo a ni tih mipui hian kan chhut thiam ve tur pawh a ni awm e.
Eng pawh ni se, tun atanga kum 22 a lo thlen huna ‘Developed India’ a nih ruala ‘Developed Mizoram’ ni ve hman tura ram hruaitute hian nasa taka tan an lak a pawimawh hle tih hi a khaikhawmna ni teh se.