Independent MLA pangate an bang An ban a ngai a, a mawi bawk : Speaker
Independent MLA panga, ZPM thlawptute’n October ni 10 khan MLA a\anga banna an thehlut a, speaker-in a lo pawm.”An ban hi a ngai a, a fair a, a mawi bawk. Anmahni tan pawh a zahawm,” tiin Lalrinliana Sailo, speaker chuan The Aizawl Post a hrilh.
Vanlalhlana (Aizawl North-I), Dr Vanlalthlana (Aizawl North-II), Lalchhuanthanga (Aizawl South-II), VL Zaithanzama (Aizawl West-III) leh C Lalsawivunga (Aizawl South-I) te’n banna an thehlut a ni.
“Heng MLA pangate hian danin a phut anga MLA atanga banna thehlut an ni a. Kum 2018 MLA General Election dawna ZPM-in Election Commission of India hnen atanga recognition an hmuh hman tak loh avanga ZPM Support Independent Candidate-a dinga tling tate an ni a. Tun tum 2023 MLA General Election lo awm turah hian an bial ngaiah theuh ZPM official candidate niin an ding leh vek dawn a ni,” tiin MLA pangate chungchangah hian ZPM chuan thuchhuah an siam.
Speaker chuan MLA pangate hi an ban a ngaih thu a sawi a, “Bang lo se, bang lovin ZPM candidate ni zui se, hektu te pawh an nei thei a. Complain a awm a nih chuan danin a bantir dawn a. Chuvangin hetia an bang hi dan zawmna a ni a, anmahni tan pawh a tha,” tiin hemi chungchang hi a sawi.
Independent MLA pangate chu Election Commission of India-ah independent candidate tia ziah an nih thu a sawi a, speaker hnenah independent MLA tia ziahluh an ni bawk tih sawiin, “Independent MLA-in an tih theih leh an tih theih loh a awm a, chung chu danah a inziak a ni,” tiin, political party candidate an nih dawn chuan an ban a ngai tih a sawi.
MLA pangate nen hian hemi chungchang hi an sawiho thu leh an ban a ngai tih a hrilh thu te a sawi a, “Term a tawp dawn a, political party candidate an ni dawn a. Chuti a nih chuan hektu an awm lo a nih pawhin an ban hi a mawi a, anmahni pawh an zalen sawt dawn a, an ban hi a tha,” a ti.
A hmain independent MLA Lalduhoma, Serchhip bialtu chu bantir a lo ni tawh a, party danga an luh dawn avangin tun hnaiah Dr K Beichhua, Siaha bialtu leh KT Rokhaw, Palak bialtute an bang bawk.