India-a Choksi-a hruai haw a tumna Belgian court-in ngaihtuah hnai

India-a Choksi-a hruai haw a tumna Belgian court-in ngaihtuah hnai
Punjab National Bank-a Rs. vaibelchhe 13,000 tihchingpennaa India-in a man duh, Belgium-a lung in tang mek, Mehul Choksi-a hruai haw tuma hmalakna chu Belgian court-in Thawhtanni atang hian a ngaihtuah tanh dawn niin Indian thuneituten an sawi.
Court-ah hian Belgian federal prosecutor-te thuremtu turin an thu dawn a, India atang hian CBI leh external affairs ministry aiawh an inlan bawk ang.
Choksi-a hi kum 2023 atang khan Belgium-ah a cheng tan nia hriat a ni a, European ramah hian a inenkawl duh avangin Antigua & Barbuda atangin a pem niin thuneitute chuan an sawi a. A nupui hi Belgian a ni.
CBI chuan Belgium-a a awm thu hi January, 2024 khan hriattirna a dawng a, hemi hnu atang hian hruai haw tumin hma la a la nghal a. European ram nen hian kum 2020 khan inremna lo siam tawhin mi tang inthleng tawn an remti a, Choksi hi hruai haw a nih chuan he inremna an hmanna hmasa ber a ni thei dawn a ni.
India-in a ngen angin Choksi-a hi April khan man a ni a. Vawi eng emaw zat bail a dil tawh a; mahse, court tam takin an hnawl tawh.
CBI chuan Europe-a law firm langsar tak tak, ram danga mi tang hruai haw lama thiam bikte pawh a rawn nasa a. Court-ah pawh hian CBI team inlanin hruai haw a nih theihna tura an tanchhan, an lehkha neih leh tul hrang hrang pharh an tum.
Agency hian an lehkha ken zingah Choksi-a laka chargesheet, FIR leh dan a bawhchhia tih finfiahna pawh telin Belgian thuneitute hnenah an thlen ang a, India-in hrem a duh chhan hi European ramah pawh hrem an duhna tho a nih thu pawh an thlen ang a, inrema an neihah hruai haw theihna a tel niin an sawi bawk.
Choksi-a hi Indian Penal Code (IPC) section hrang hrang – pawikhawih tura mi phiar, mi bum leh account tihdanglam hnuaiah thubuai siamsak a ni a. Prevention of Corruption Act hmangin thubuai siamsak a ni bawk a, hei hi Belgium-ah pawh dan bawhchhiatna tling a ni.
Central agency hian an hruai haw ngei theih nan United Nations Convention against Transnational Organised Crime (UNTOC) leh United Nations Convention against Corruption (UNCAC) an hmang bawk.
Mumbai-a special court-in kum 2018 leh 2021-a manna thupek a chhuah pawh Indian agency-te chuan an hruai haw theih nan an Belgian thawhpuite hnenah hian an thlen tawh.
Choksi-a India-a hruaitir theih lohna lian tak chu an khua leh tui nihna a neih vang a ni a, Antigua & Barbuda ram mi ni mah se kum 2017 khan Belgian a lo nei tawh a ni.
PNB-a inbumna lian tak a awm tih a darh hma ni lawk, January 4, 2018 khan India a chhuahsan a. Antigua & Barbuda khua leh tui a nihna hi November, 2017 khan khatih laia an prime minister, Gaston Browne-a chuan a hlihsak a, court-ah khing letin thu la tihfel loh a ni.
India hian hruai haw a nih theih nan Belgium-a thuneitute hnenah Mumbai-a an tantirna tur, Arthur Road Prison chungchang pawh hrilh tawhin engmah atan harsatna a awm dawn lo va, dik lo taka inenkawlna pawh a thleng dawn lo tih an sawi.