India a lum tan, khawpui 21-ah 42°C chung lam

India a lum tan, khawpui 21-ah 42°C chung lam
India-ah nipui a intan mek a, Pathianni khan khawpui 21 zetah a lum lai berin 42°C leh a chung lam a ni hlawm.
Khawpui ber, Delhi-ah chuan ni thum chhung khaw lum uchuak tak a la awm zui dawn a. Delhi bakah hian Rajasthan, Madhya Pradesh, Maharashtra, Gujarat leh Odisha pawh a la lum zui dawn.
April chawlhkar khatna a liam a, khawpui tam takin lum uchuak tak an tawng nghal hlawm a. A nih dan thin pangngai aia a lumna hi 3-6.9°C inkar a ni hlawm.
Met office chuan thli thaw chak chu khaw lum uchuak tak thlen chhan pakhat a nih thu an sawi a, a bikin Delhi-ah a ni zual tih an sawi.
“Zing lamah khan thli hi darkar khatah km 8-10 vel a ni a. A chak lo telh telh a, chawhnu lamah kha chuan chhimchhak hawiin darkar khatah km 4-6 vel a ni a. Zan lamah khan chak leh hretin chhimchhak hawi thovin darkar khatah km 8 tling lo deuh a ni leh,” an ti.
Rajasthan-a Barmer chuan record thar a siam a. Pathianni khan 45.6°C niin April chawlhkar khatnaa a lum ber tum a ni a, a nih dan thin pangngai aiin 6.8°C zetin a lum zawk.
Met department chuan Pathianni atanga Ningani thleng hian Gujarat hmun thenkhatah lum uchuak tak a awm dawn tih an sawi a, Saurashtra leh Kutch vel chu a tuar zual tur an nih thu an sawi.
Hetih hun lai vel tho hian Rajasthan-ah pawh a lum hle dawn tih an sawi bawk.
Himachal Pradesh hmun thenkhat, Haryana, Chandigarh, Punjab, Madhya Pradesh leh Uttar Pradesh khawthlang lamah a lum zual hle dawn niin met office chuan an sawi bawk.