India-a Nipah kai hmuh vangin a thenawm ramte inralring

India-a Nipah kai hmuh vangin a thenawm ramte inralring
Natna hri hlauhawm tak, Nipah virus chu India-ah a kai pahnih hmuh an nih hnuah Thailand, Singapore, Hong Kong leh Malaysia-ah chuan a darh tur ven nan thlawhna tumhmunah endikna (screening) kalpui nghal a ni.
He hri hi bak chi khat atang leh vawk leh ransa dang atanga darh a ni a, khawsik leh thluaka khawsik lut thlenin a kai 40% atanga 75% inkarin an thihpui thei a. Mihringin mihringah a kai thei a, a inkai erawh a awl lem lo va, a kai nen rei deuh tak awmho a ngai.
Mihringah hian he hri vei bak emaw, an ei hnu thei em emaw atangin an kai deuh ber.
India-ah hian December thla tawpah khan a kai hmuh a ni tawh a. Mi thiamte chuan nasa taka a darh chiam a hlauhthawnawm lem lo niin an sawi a. A invenna damdawi pawh siam a mek hlawm a; mahse, a taka hman theiha peih a la awm lo.
“Kan fimkhur a tul em em rual hian vantlang hriselna nghawng thei khawpa a darh hlauhawmna a la awm rih lo,” tiin Britain-a University of Essex-a molecular virology lecturer Efstathios Giotis chuan a sawi.
India-a kai hmuh chhuahte hi West Bengal-a mi niin damdawi ina thawk an ni a, December thla tawpa hriat chhuah kha niin enkawl mek an ni.
Thuneitute chuan anmahni nena inhnaiha awm mi 196 an chhui chhuak tawh a, tute mah hri kai anga awm an awm lo va, endiknaah pawh an kai lo tih finfiah vek an ni tawh tih Thawhlehni khan Indian health ministry chuan a sawi.
“Nipah virus chungchangah hian thil dik tawk loh thehdarh a ni,” an ti a. “Thlithlai, laboratory test leh field investigations tih a ni a, hri hi a hun taka hmeh mih a ni,” tiin ministry chuan a sawi.
India-a a kai an awm avang hian Asia chhimchhaka an thenawm, Nepal leh Hong Kong pawh telin, an fimkhur phah a ni.
Singapore-a Communicable Diseases Agency chuan Nilaini khan tumhmunah India-a a kai awmna lai vel atanga thlawk lutte temperature screening an buatsaih dawn thu an sawi.
Hong Kong airport authority thupuangtu chuan Hong Kong International Airport-ah health department-in health screening tihna tur an kalpui tih an sawi a, hetah hian India atanga thlengte chu gate-ah temperature ensak an ni tih a sawi.
Thailand chuan kar tir atang khan tumhmuna mi endik hi kalpuiin an thenawm, Malaysia pawhin an ti.
Thailand-ah hian Nipah kaite awmna atanga thlengte chu tumhmunah an awmna tur bik an siamsak niin health ministry-in a sawi a, an him tawk tih finfiah hma chu kaltir an ni lo.
Malaysia-a health ministry chuan lawngchawlh hmunah pawh rinhlelh ram atanga lutte endik an ni tih an sawi.
China-a disease control authority chuan Thawhlehni khan Nipah kai an la hmuh loh thu sawiin ram dang atanga lut erawh an awm thei niin an sawi.
India nena inri, Nepal pawh an inringin khualzinte chu uluk takin an endik.
Nipah hi kum 25 chuang liam taah khan Malaysia leh Singapore-a vawk vultuten an kai chiam tawh a. Scientist-te chuan sihal leh bak atangin an kai a nih an ring.
WHO chuan Nipah hi a invenna leh enkawlna a la awm loh avangin natna hlauhawmah a chhiar a. A kai zingah thihpui an tam hle bawk.
India-ah pawh a kai hmuh an ni fo a, a bikin Kerala-ah niin khawvela Nipah kai mai hlauhawmna hmun ber nia sawi hial a ni a. Kum 2018-a hmuh a nih atangin tam takin an thihpui tawh a. Bangladesh-ah pawh a kai hmuh an ni fo bawk.
December, 2025 khan khawvel pumah a kai mi 750 hmuh niin mi 415 an thi niin Coalition for Epidemic Preparedness Innovations chuan a sawi a, anni hi a invenna damdawi siam tuma bei mek an ni.
West Bengal-a hmuh hi kum 20 dawn hnua a kai hmuh leh hmasak ber niin kum 2007-a a kai mi panga chu an thi vek a ni.