India-a siam smartphone thawn chhuah pung nasa

Tangka kum kal mek, 2026-27 tir lam thla thum chhunga India-in smartphone a thawn chhuah chuan a tam ber tum tawngin $ tluklehdingawn 10 man dawn a tling a, hei hi Apple iPhone thawn chhuah a tam vang pakhat a ni.
Kum kal ta tun ang hin, April leh June inkar khar India hian smartphone $ tluklehdingawn 7.97 man thawn chhuakin kuminah hian 23.4%-a pungin $ tluklehdingawn 9.84 man an thawn chhuak.
US chu India-in a thawn chhuah tam berna ram a nih chhunzawm a, India-a siam smartphone hi duhtu an tam hle.
Smartphone thawn chhuah pung hian electronic thil thawn chhuah zat pawh a tipung hle a, April leh June inkara electronic thil thawn chhuah zawng zawng chu $ tluklehdingawn 15.2 man niin heng zinga 64.8% zet hi smartphone a ni.
India-a siam smartphone-te hi nikum atang khan thawn chhuah a pung hle a. Kum 2025 khan ‘Made in India’ smartphone chhuak zat chu 8%-in a pung a, thawn chhuah pawh 28% laiin a pung bawk a. India-a siam hmun thuma thena hmun khat dawn chu ram pawna thawn chhuah a ni.
Apple-in a siam chhuah smartphone chu India-in a thawn chhuah tipungtu lian ber a ni a. Kum 2025 chhung khan Foxconn Hon Hai chuan a hma kum aiin iPhone a thawn chhuah hi 48%-in a pung a, Samsung pawh pungin 4%-in a thang bawk.
Kumin kum tir lam khan India-a siam iPhone thawn chhuah zat chuan kum kal ta khan Rs vaibelchhe nuai 2 a tling a, Apple hi smartphone siamtu zawng zawngah India atanga thawn chhuak tam ber a ni.
Kum kal ta pum khan India atang hian smartphone $ tluklehdingawn 29.4 man thawn chhuah a ni a, iPhones bik thawn chhuah hi 75% chuang ($ tluklehdingawn 22 man) a tling a ni.
India atanga smartphone thawn chhuah pung hi sorkarin production-linked incentive (PLI) scheme a kalpui bakah special economic zone (SEZ) a siam that vang a ni pakhat a. Electronic thil siam chhuah tam zawkna tur sum dahin foreign direct investment (FDI) thlah zalenin khawvela siamna hmunpuia chantir tumin hma a la a ni.