India-a tlem zawkte huatna sawina a pung nasa

India-a tlem zawkte huatna sawina a pung nasa
Kum 2024 chhung khan hnam leh sakhaw zuitu tlem zawkte deusawhna leh huat zawng thu sawi chu 74% zetin a pung a, ram pum inthlanpui neih laiin a zual hle bawk tih report tharah tar lan a ni.
Thawhtannia Washington-a thil zirchiang pawl, India Hate Lab-in report a siam tihchhuahah hian nikum chhung khan hetiang hi vawi 1,165 a thleng a, a sawitu zingah politician lawk tak – Prime Minister Narendra Modi leh Home Minister Amit Shah te pawh an tel.
Muslim-te laka sawi a tam ber a, 98.5% zet a tling.
Report-ah hian hetiang thu sawi hi Modi-a telna party emaw, sorkar siamtu zinga an tel vena state-ah a tam zel bawk tih tar lan a ni.
India-ah hian kum tam tak kal ta atang khan Hindu sakhaw la vawng tak, BJP hruaituten India-a a tlem zawkte, a bikin Muslim an bei nasa tih sawi thin a ni.
Rorel lai party hian Islam sakhaw hlauhna (Islamophobia) vawrh darh leh huatna thu sawi anga puhna hi an pha nasa hle a. Dikna chanvo humhalhtu leh eptu hruaitute erawh chuan an puh nasa hle thung.
Thawhlehni khan an party thupuangtu chuan chhangin an ramah ‘dan khauh tak neiin muanna, remna, thupek leh tharum thawh lohna a awm theih nan kenkawh tlat a ni zawk’ tih CNN hnenah a sawi.
“India hian tun lai khawvelah hian mite eng emaw an ngaihven zawng an sawia India hmel tibal thei puan tum hrim hrim, ‘anti-India reports industry’ hi a mamawh lem lo,” tiin Jaiveer Shergill chuan a sawi.
Hetih lai hian an party hian nikuma inthlanpui campaign lai khan mi dang huai zawng an sawi nasa hlea puh a ni a. Prime minister ngei pawh Muslim beia inthen darh theihna thu sawiah puh a ni a. May thla khan Election Commission chuan eptu party-ten ‘Muslim dahhniamna’ an tar lang nia an puhna avangin an party hi social media-a an thil dah paih leh turin a lo ti tawh bawk.
India Hate Lab report-in a tar lan an chuan May, 2024 khan huatna thu sawi 269 a thleng a, a tam lai ber a ni.
Kristiante pawh beih an ni thin a; mahse, Muslim lakah chuan tuar na lo tak niin report-ah hian tar lan a ni.
Mihring dikna chanvo humhalhtu pawlte chuan a tlem zawk, a bikin Muslim-te hian kum 2014-a Modi-a kaihhruai sorkar a din atangin beih an tawk nasa zual niin an sawi a. BJP chuan hei pawh hi vawi tam an lo pha tawh.
Lab-in report an siamah hian hetiang thu sawina hi politics-a beihpui thlakna, sakhaw thil tihna, lungawi loh lantirna leh hnam thil tihnaah a thleng nasa tih an tar lang a. Hetiang hunah hian vawi 931 (79.9%) a thleng a, a thlenna hmunte hi BJP rorelna emaw, roreltu zinga an tel vena emaw zel a ni bawk.
BJP rorlna state pathum – Uttar Pradesh, Maharashtra leh Madhya Pradesh-ah mi huat thu sawi zahve dawn hi a thleng niin tar lan a ni.
Rorel lai party hian nikum khan politics thil tihkhawm hi vawi 340 a huaihawt a, a hma kum aiin 580% zetin a tam zawk.
“Kum 2023 aia 2024-a mi huat zawng sawi a punna a sang hle a, politics leh sakhaw hruaituten ualau takin Muslim lakah tharum thawhna lam lanna tawngkam an hmang ngam a ni,” tiin report-ah hian an tar lang.