Larsap-in department 4 hotute kawm

Larsap-in department 4 hotute kawm
Larsap Gen Vijay Kumar Singh (Retd) chuan department pali – Rural Development, Agriculture, Animal Husbandry & Veterinary leh Fisheries hotute chu Thawhlehni khan Raj Bhavan-ah a hran theuha kawmin sawrkar laipui scheme pawimawh tak tak hnuaia an hmalakna leh harsatna tawh a sawipui.
Hmasawnna kawnga pawimawh tak, sawrkar laipui scheme hrang hrang hnuaia Mizorama hmalakna hriatchian bakah harsatna tawhte sawrkar laipuia bawhzui thuai a nih theihnan thutkhawm a ni tih larsap hian a sawi a. Mipuiin an tana ruahman hamthatna hrang hrang an hriatchian a, an chhawr tangkai theihnan scheme chungchanga pawimawh hrilhhriat leh chhawmdawl kawnga theihtawp chhuah zel turin department hotute a chah.
Scheme tangkawp theite pawtkhawm a, hmasawnna ruhrel tha leh rotling siam ngaihpawimawh a tul tih sawiin, Mizorama self help group-te thil siam chhuah, sawngbawl dan leh zawrh tura chhawpchhuah a nih dan chu fakawm a tih thu a sawi. Hmasawnna rahbi thar, loneitute tana tha zawk leh thlanawm tak ngaihtuah zel tura chahin, organic thlai thar chhuah kawngah tan la turin a fuih. Ran hriselna ngaihpawimawh a tul thu leh sangha thar chhuah kawnga hmalak a tul thu a sawi a. Department hotute chu langtlang leh rintlak zawka hma lak a nih theihnan digitization ngaipawimawh tel turin a chah bawk.
Thutkhawmah hian department hotuten powerpoint presentation kaltlangin an hmalakna an sawifiah a. Sawrkar laipuia bawhzui ngai harsatna an tawhte an thlen a ni.
Larsap-in department pali hotute a kawmnaah hian Rural Development commissioner & secretary R Zarzosanga, Fisheries secretary HM Hualsangi, Agriculture & Farmers Welfare special secretary Ramdinliani, RD addl. secretary Lalnunhlua, AH& Vety addl. secretary Dr Andrew H Vanlaldika bakah Secretariat leh Directorate-a department hotute an tel a ni.