India-ah Covid kai mi 5,755 awm tawh

India-ah Covid kai mi 5,755 awm tawh
India rama Covid-19 leng thar leh tan mekah a kai mi 5,755 hmuh chhuah tawh an ni tih union health ministry chuan a sawi a, Kerala chu a tuar na ber an ni.
Sorkar laipui chuan state zawng zawngte chu oxygen, isolation bed, ventilator leh damdawi mamawh zualpui chhek leh indaih a awm theih nana hma la turin a ti hlawm.
Kerala chu a tuar na ber niin a kai enkawl mek mi 1,915 an awm a, a kai mi 127 hmu chhuah thar an ni a. Delhi-ah mi 892 enkawl lai awmin Maharashtra-ah 681 an awm mek bawk a. Gujarat, Tamil Nadu leh West Bengal-ah a kai enkawl lai hi mi 300 chuang theuh an awm bawk.
Himachal Pradesh leh Tripura chu tuna hri kai awm rih lohna an ni mek.
India ram pumah January atang khan Covid kai mi 5,484 enkawl dam tawh an ni a. Thla hmasa atanga hri kai an tam leh tan hnuah mi pali thi an awm tawh a. January atang khan Covid kaihhnawiha thi hi mi 59 an awm tawh a ni.
Covid thihpui chhinchhiah zinga 18 chu Maharashtra-a mi niin a tam ber an ni a, heng zinga 17 hi natna dang nei tel an ni a. Kerala-ah Covid vanga thi mi 12 an awm tawh bawk.
Kar kal ta khan Director General of Health Services (DGHS) A Dr Sunita Sharma kaihhruaiin India-a hri leng thar leh mek chungchang thlirin thutkhawm a ni a, hmalak zel dan tur leh inkaihhruaina siam dan turte pawh an sawiho.
State leh union territory zawng zawng aiawhte pawh he thutkhawmah hian telin hri leng mekah hian lo hmachhawn turin tihhmaih an neih lohna turin hma an la a ni.