India-ah M.Pox la hmu rih lo Mizoram a inralring reng tho

Tunhnaia khawvel ram hrang hranga natna hri leng mek Monkey Pox (M.Pox) chu India-ah chuan a vei hmuhchhuah an la awm chiah loa, chutihrualin rawn lut thut thei a nih avangin Mizoram Health department chuan tun atangin kawng hrang hrangin a inralring mek.
Health & Family Welfare department hotute thukhawm chuan khawvel ram hrang hranga M.Pox case san chhoh zel dan, invenna leh enkawlna bakah inbuatsaihna chungchang an inhrilhfiah a. India ramah case hmuh la ni chiah lo mah se, tunlai khawvelah inkalpawhna a awlsam tawh avangin he hri hian min luh chilh thuai loang tih a sawi theih loh tih sawi a ni.
Indian Council of Medical Research (ICMR) in Zoram Medical College chu ‘sentinel site’ atan a puan tawh avangin, thuamchaka tih changtlun chhoh zel a ni a. India rama laboratory tha zual thlan chhuah 28 zingah a tel. Hei vang hian ZMC pawh hian 2023 December atang khan hrileng a awm palha lo inrinlawk dan tur hi ruahmanna a lo kalpui tawh a. ZMC bakah hian Civil Hospital Lunglei pawh tlema tih changtlun chuan sentinel site atan hman mai theih a nih beisei a ni.
Health department hotute hian Core Committee on M.Pox an din a. He Committee hnuaiah hian committee peng hrang hrang din a ni ang. State Level Committee erawh a tul dan angin thuneitu sangte kaihhruaia din nise, tih a ni.
Health department thuchhuak chuan, social media hrang hrang hrangah Siaha naupang M.Pox hri kai hmuh chhuah ni awma thuthang chu a dik loa, naupangin a vei natna hi Tangseh (Chicken Pox with Secondary infection) a ni zawk a, naupang hi tunah chuan a dam tawh tih a sawi.
Social media-a thuthang dik lo awm thin chu pawi an tih thu sawiin, hemi kawngah hian thil chiang lo, mipui thin tithawnga tithlabar thei theh darh lo turin mipui a ngen a. Chutih rualin he hri avanga chiai mai lo tur leh sawrkar leh department hmalakna ngaichang thiam turin mipui a chah.
‘Monkey Pox hi Mizo tawngin a hming kan la neih chiah lo a. ‘Zawng hri’ tia Mizoin kan lo hriat lar thin ‘Small Pox’ nen erawh a inang loa, ngaihpawlh loh tur a ni,’ Health department thuchhuak chuan a ti.