India-ah Trudeau nuihzabur a ni ti

India leh Canada ramte inpalai tawnna chungchanga thu inchuh kal mekah Canada rama opposition party leader Pierre Poilievre chuan na takin Prime Minister Justin Trudeau chu sawisel-in “India ram nuihzat bur a ni,” tiin a sawi. Poilievre hi Canada ram Prime Minister thar tur atana mipui beisei mek niin a kaihhruai party hian tuna sorkarna chang mektu Liberal Party aiin a let hnih laiin mipui ngaihdan lakkhawmnaah hma a hruai fal a ni. Nepalese chanchinbu Namaste Radio Toronto-in an kawmnaah Poilievre chuan, “Khawvela democracy ram lian ber India-ah chuan Justin Trudeau hi nuihza siamtu ang maiin an ngai a ni,” tiin a sawi a. Chanchinbumite nena an inkawmnaah hian Prime Minister a nih chuan India nena kan inlaichinna hi siam that niin ‘Professional relationship’ kan siam ang tiin a sawi a ni.
Tunlaia India leh Canada te inkara inlaichinna tha tawk lo awm chungchanga zawhna chhangin Poilievre chuan, “Hei hi kum riat kal ta chhunga sum leh pai leh thil danga insenso zawng zawng atanga chhut-a Justin Trudeau-a hmalaknain a khuh zawh loh chu ni. Justin hian Canada ram chhungah ngei pawh mipuite a inhuat tir a, khawvel ram dangte nen kan inlaichinna tha neihte a chhem kiang vek a ni.
Hruaitu chak lo leh thiam lo a nihna chu khawvel ram thil ti thei ber ber sorkar te nen kan inlaichinna a chhia-in kan innghirngho a, heng zingah hian India ngei pawh hi a tel a ni,” tiin a sawi a ni.
“India nen hian inlaichinna tha tak neih kan mamawh a ni. India hi khawvela democracy ram ropui leh lian ber a ni a, kan inremlohna lai hi chiang taka kan hriata siam that theih tura kan inbuatsaih tawn hi a ngai a, hemi tur hian inlaichinna tha, dik leh rem hre tak kan neih a ngai a, chu chu Canada Prime Minister ka nih hunah kan thlen tir ang,” tiin a sawi bawk a ni.
Trudeau-a foreign policy kalpui mek dan sawiin Poilievre chuan US President Joe Biden chu Canadian PM chungah a duh dan danin a kal kual a, kawngkaa ke tahna chhuatphah ang vel lekin a ngai a ni, tiin a sawi a. “Trudeau-a’n kum riat chhung ro a rel hnu hian kan hmingthatna te chu a keh sawm vek ta a ni. Beijing chu kan ram chhungah rawn inrawlhin Canada-ah ngei mai mipui te tibuai turin police station te a rawn siam a. Democracy ram lian ber India chuan nuiza siamtuah a ngai ta a, President Biden chuan kawngka a ke tahfaina ang lekah leh naupang inawmlemna ang leka then kual mai mai tawkin a ngai a ni,” tiin a sawi bawk.
Poilievre chuan Trudeau chu Canada tana buaina siamtu a ni tih sawiin Prime Minister ni zui zel thei a ni lo tiin a sawi a. Conservative Party hruaitu chuan Canada-a Hindu Temple beih a nih a duh loh thu sawiin, “Hindu temple beih a ni leh an hruaitute vaua tih thlabar an ni hi na takin ka dem a ni. India palaite run an nih dan mipui thiltih khawmna hmuna tarlan a ni te hi engti kawng maha pawmzam theih chi a ni lo.
Hindu temple hmuna bungrua leh mipuite beitute hi hmun danga thil thleng ang bawkin thiamloh chantira hrem ngei ngei tur an ni,” tiin a sawi bawk a ni.