India aiah ‘Bharat’ tiin sawmna pe chhuak

Congress party chuan Narendra Modi sorkar hnuaiah ‘Union of States’ chuan beih a tawk tia sawiin hei hi G20 dinner neih tura President-in sawmna a semchhuahah ‘President of Bharat’ a intih vang a ni.
“Rashtrapati Bhawan chuan September 9-a G20 dinner neih tura sawmna a semchhuahah ‘President of India’ tih aiah ‘President of Bharat’ tih a hmang a ni” tiin Congress general secretary Jairam Ramesh chuan a sawi a.
“Article 1 of the Constitutiona chuan ‘Bharat, India chu Union of States a ni ang'” a ti a. Tunah chuan ‘Union of States’ chuan beih a tawk ta a ni,” tiin Ramesh chuan a sawi bawk.
G20 summit hi National Capital ah September 9 leh 10 ah neih tur niin India president nihna chelh mek lai niin khawvel ram hrang hrang hruaitu lawk te US President Joe Biden te pawh an tel dawn a ni.
Tun hi India-in official event a India tih aia ‘Bharat’ tih a hman tumkhatna a ni a. ‘Bharat’ tih thumal hi Constitution-ah tel tho a ni chungin official a hman a ni ngai lo.
‘Bharat’ tih chu G20 booklet foreign delegates te hnena pekah pawh hman niin India-in G20 president a nih laia a thiltih that te tarlanna siamah ‘Bharat, The Mother of Democracy’ tia dah a ni bawk a.
“Bharat, chu chu India ni bawkah sorkarnaah mipui remtihna chu history hriat theih china nunphunga bet tlat a ni,” tiin booklet khuh hawnnaah tarlan a ni.
Assam Chief Minister Himanta Biswa Sarma chu India tih aia Bharat tih hman fak hmasa ber niin, “REPUBLIC OF BHARAT – kan civilisation in AMRIT KAAL pana hma a sawn zel hi ka lawmin ka chhuang a ni,” tiin a sawi zui nghal.
“BJP tena official G20 summit invitation a thawnchhuaha ‘President of India’ tih aia ‘President of Bharat’ tih a hman hian sawi a hlawh nghal a ni. Eng vangin nge BJP te hian ‘INDIA’ an hnawl? He ram hi political party pakhat thuhnuaia awm a ni lo va, 135 crore Indians te ta a ni a. Kan national identity hi BJP te personal propety a ni lo” tiin AAP leader Raghav Chadha chuan a sawi.
Centre-a BJP sorkarin thutlukna a siam hma lawk hian BJP ideological mentor Rashtriya Swayamsevak Sangh (RSS) te chuan India tih aiah Bharat hman tawh tur an ti bawk a.
“India tih hmang tawh lovin Bharat tih kan hmang tawh tur a ni. A hun lai khan English hman te hriatthiam theih nan India kan hmang mai a ni. Tunah chuan kan hmang tawh tur a ni lo va. Bharat tih hming chu khawvel khawi hmunah pawh kal la Bharat a ni tho ang a. Ziak leh sawiah tute pawhin Bharat an ti tur a ni” tiin RSS chief Mohan Bhagwat chuan a sawi.
Kumin July thlaa opposition intelkhawm tena acronym INDIA – Indian National Developmental Inclusive Alliance an hman hnuah Bharat debate chu a nasa zual zel a.
“NDA leh INDIA inbeihna, Prime Minister Narendra Modi leh INDIA inbeihna, BJP ideology leh INDIA inbeihna a ni a. India do an awm chuan eng nge thleng, tu nge chak in hria,” tiin Rahul Gandhi chuan a hmain a lo sawi tawh bawk.
Opposition tena INDIA an hman chu Prime Minister Narendra Modi ngei pawhin na taka beiin opposition te chu INDIA tih hming hmanga an sualna te tleuhfai tumah a puh a. “An hming chu UPA atangin INDIA tiin an tlak a, chu chu mirethei te laka an chet diklohna te thup tumna a ni. INDIA tih hming an hman hi ram an hmangaih vang aiah ram rawk an tumna zawk a ni,” tihialin a lo sawi tawh bawk.
Nationalist Congress Party (NCP) president Sharad Pawar chuan eng ram mahin ram hming thlak theih ngawtna an nei lo tiin a sawi zui bawk a. He mi chungchang hi INDIA Alliance tena Nilaini a meeting an neih hunah an khelho tur thu a sawi bawk a.
“Rorel lai BJP tena ram hminga buaina an nei vak hi ka hrethiam lo,” tiin NCP chief chuan a sawi bawk.
PDP chief Mehbooba Mufti pawhin BJP te chuan Parliament-ah majority nei mekin ram pumpui chu ‘an ram hawh’ angah an ngai tiin a sawi a.
“BJP tena India foundational principle ‘unity in diversity’ an kalhna hian a tawpkhawk a si tawh a. Hindustan atanga India hming tam tak te chu tihniam zelin tuna Bharat an tih bur hian an dawh theih lohzia a pholang a ni,” tiin a sawi bawk a.
West Bengal Chief Minister Mamata Banerjee pawhin, “He ram hi Bharat kan ti a, eng nge thil thar awm chuang? English-in India kan ti a, engmah thil thar a awm lo. Khawvelin India tiin a hria a. Eng vangin nge ram hming thlak thut chu a tulna?” tiin zawhna a siam bawk.