India aiawh biak hnuah Mizoram tlawmngai pawlte nen inbe dawn

Nilaini hian Manipur-a Zo hnahthlakte hruaitute leh Mizorama tlawmngai pawl hruaitute an inbe dawn; Zo hnahthlak aiawhte hi tun hnaiah Delhi-ah India aiawh nen an inbia a, an inbe zo hi Aizawlah an kal nghal a ni.Manipur-a Zo hnahthlak ralthuam lek pawlah hian a hlawm lian pahnih, KNO (Kuki National Army) leh UPF (United People’s Front) an awm a, anni hi India sorkar nena inkah hai puang mek an ni. KNO leh UPF aiawh te, Zo hnahthlak pawl hrang hrangte aiawh te leh Zo hnahthlak MLA-te chu August ni 31 leh September ni 1 khan Delhi-ah India sorkar aiawh AK Mishra nen an inbia a, an inbiak zawhah Mizoram tlawmngai pawlte NGO Coordination Committee te nena inbe turin Aizawl an pan a ni.
“Manipur-a Zo hnahthlakte inlungrualna tur hi kan thupui tur chu a ni,” tiin NGO Coordination Committee chairman, Central YMA president R Lalngheta chuan The Aizawl Post a hrilh.
“Inlungrual se, insuihkhawm se tih hi kan duh dan, an buai tirh atanga kan buaipui a ni a. Anni lam pawhin hei hi an ngai pawimawh a, an inlungrual theih nan hian theihtawp kan chhuah a ni,” a ti bawk.
Zo hnahthlak aiawhte’n Delhi-a an biak AK Mishra hi Manipur-a Zo hnahthlak ralthuam lek pawlte leh sorkar lam kara palai (interlocutor) a ni.
Zo hnahthlak aiawhte hnen atanga thu dawn danin, Meitei nena awm dun theih an nih tawh loh thu, Meitei tan pawh, Zo hnahthlakte tan pawh, rorelna pakhat hnuaia awm leh chu thil tih chi a nih loh thu an sawi a, chuvangin inrelbawlna hran an mamawh tih thu AK Mishra hnenah hian an sawi. Mishra hian union home ministry-ah a lo thlen tur thuin a chhang tih an sawi bawk.
Mishra hmuhnaah hian Zo hnahthlak MLA 10 zinga pariat an tel a, an zinga engemaw zat hi Mizoram tlawmngai pawl hruaitute be turin Aizawlah an kal ve nghal nia hriat a ni.