INDIA alliance coordination meeting nei

Indian National Developmental, Inclusive Alliance (INDIA) coordination committee chuan nimin khan meeting hmasa ber an nei.
Agenda zingah alliance chu kum 2024 Lok Sabha election atan chauh nge State panga inthlang turah pawh a tel tho em tih te pawh an sawi dawn nia ngaih a ni bawk a. Hei bakah hian panel te chuan constituency tina seat-sharing kalpui dan tur pawh an sawiho a ngai bawk a. Committee member 14 zingah Trinamool Congress leh CPI(M) member te chu an tel thei dawn lo thung.
Kar kalta khan Aam Aadmi Party te chuan Madhya Pradesh leh Chhattisgarh Assembly election atan candidate 10 ve ve an puang tawh a. Chhattisgarh-ah chuan Congress te chuan sorkar leh an tum a, Madhya Pradesh-ah chuan BJP te kum 18 rorel tawhna thlak an tum thung. A bik takin Punjab leh Delhi angah te AAP leh Congress te inbeihna berah chuan INDIA alliance kal dan tur hriatthiam a har thunga ngaih a ni.
A hma lawkin Delhi Chief Minister Arvind Kejriwal chuan Delhi Services Bill Rajya Sabha in a ngaihtuahnaah opposition party te chu lawmthu a hrilh thung a. Opposition te chuan vote 29 in chakna an chang pha lo chungin an lungrual em avangin psycholigical victory nei anga ngaih an ni.
Madhya Pradesh bikah chuan Samajwadi Party te chu an lian lo thung a, hei vang hian chiang taka inremna awm se an duh tia sawi a ni a. Inthlan hnuhnung berah khan seat khat chauh an la a, constituency parukah pahnihna an ni thung a. Kum 2003 kha chuan legislator pasarih an nei thung. “Meeting tum thum kan nei tawh a, INDIA hian Lok Sabha chauh a huam dawn nge State election pawh a huam dawn tih kan la hre thei lo va, chiang taka kan sawiho vat a ngai a ni” tiin senior Opposition leader chuan a sawi.
Mumbai summit-ah kha chuan Trinamool Congress, JD(U), AAP leh RJD te chuan seat insem chu a rang thei ang bera tihfel ni se tiina n lo rawt tawh thung.
“A hma thei ang berin kum 2024 kan nghah a rem lo, September emaw October chhungin seat insem kan tihfel hman a ngai a. State thenkhatah chuan party lian leh chak chuan hma an hruai mai anga emaw kum 2019 election emaw State Assembly inthlan hnuhnung bera chet that dan azirin kal mai ni se emaw kan chinfel thuai a ngai a ni” tiin opposition leader pakhat chuan a sawi a. Entir nan, Delhi-ah chuan AAP te chuan a zawnin Assembly inthlanah chakna an chang tawh a, 2019 Lok Sabha poll ah erawh Congress te chu constituency pasarih-ah pahnihna an ni vek thung tiin a sawi bawk.
Tun meeting-ah hian INDIA party a parliamentary member ngah ber dawttu Trinmool Congress te erawh an tel thei lo thung a, a chhan pawh an nominee ber Abhishek Banerjee chu Enforcement Directorate tena thu zawhfiah atana an koh vang a nia, TMC te chuan a aiawh an tir lo a ni.
“INDIA coordination meeting hmasa ber neih hun tur a hma kar daihah tarlan a ni tawh a, sorkar hian tibuai zawnga chet la turin hun a nei a. Tuna Abhishek Banerjee INDIA alliance meeting ni khera thu zawhfiah tura a koh pawh hi thil thleng tura an duan lawksa a ni,” tiin senior Trinamool leader chuan a sawi.