India an champion

une 18, Pathianni zan khan Bhubaneswar-a Kalinga Stadium-ah Hero Intercontinental Cup final khelh a ni a, inelna thlengtu India chuan si hnih faia Lebanon hnehin an champion. Final-ah hian Mizo player Lallianzuala Chhangte chu ‘Hero of the Match’ ah thlan a ni a. India defender Sandesh Jhingan chu ‘Hero of the Tournament’ ah thlan a ni ve thung.
Final-ah team hnihte an fimkhur a, goal thun tuma innawr aia goal venhim lamah tan an khawh hmasak vangin first half-ah inkhel hmuhnawm hmuh tur a awm lo. Team hnihten hlauhawm an siam tam tawk lova, goal lovin chawlhlawk an hmang.
Chawlhlawk hnu lamah inelna thlengtu India chu team thar ang maiin an inlan a, inkhel boruak a danglam ta hlawk. Second half tantirh phat atangin Mizo tlangval LZ Chhangte a hmuhnawm a, ani hi inkhel boruak chawk nungtu a ni. Minute 46-na lekah ding lam sir atanga LZ Chhangte cross tha zet mai chu captain Sunil Chetri chuan awlsam takin a pet goal a, hmahruaina goal a thun. India captain Sunil Chhetri hian ram tan goal 87 a thun tling chiah a, football khel mek zingah ram tana goal thun tam lamah pathumna a ni mek a, a chungah player ropui fal pahnih Cristiano Ronaldo leh Lionel Messi te an awm.
Hma takah goal an thun vangin India an phur a, inrintawkna sang zawk nen an inlan zui theih phah. Goal thun belh tumin an khingpuite an nawr zui viau a, minute 69-naah Mizo tlangval Lallianzuala Chhangte chuan India goal hnihna a thun. Minute 69-naah hian bench atanga lut Naorem Mahesh Singh chuan box veilam atangin kawh zetin a pet a, a pet tha tak hi Lebanon si nghak Sabeh-a’n a lo dang ber a, ball per let leh hi Lianzuala hian awlsam takin a pet goal a, India goal hnihna a thun.
Lianzuala goal thun hnuin goal dang a luh belh thei tawh lova, India chu si hnih faia chakin an champion zui ta a ni.
Intercontinental Cup 2023-ah hian ram pali; India, Lebanon, Vanuatu leh Mongolia te inel in, vawi khat theuh an inkhel kual hnua point hmu sang pahnihin final an khel zui leh a. India chuan Group match-ah goal awm lova an inhnehtawkpui tawh Lebanon chu final-ah si hnih faiin an hneh a, he inelnaah hian a vawihnih nan an champion. India hian khelh thumah goal chuah an nei lo hial nghe nghe.