Tennis-a mi bik Djokovic

Inelna ngaihhlut hlawh tak, ‘Gentleman’s Sports’ tia an sawi mai thin chu Tennis a ni a. Tennis hi a hautak a, sum a tam bawk vangin player hlawhtlingte chuan ngaihlut an hlawh viau thin. Tennis-a hian inelna lian pali a awm a, chung inelna lian bikte chu ‘Grand Slam’ tih an ni. Grand Slam-ah hian vawi khat chauh pawh champion a har em em a, vawi 23 zet champion phei chu mi bikte chauhin an tih theih a ni a. Mipa zingah Grand Slam-a vawi 23 champion thei awmchhun chu mi bik Novak Djokovic a ni.
Tennis zin kawng
A uar fal deuh ten ‘Khawvel mihring zinga fit ber’ an tih hial Djokovic hi May 22, 1987 khan Serbia-ah a piang a. Dijana leh Srdjan Djokovic te fa hming koh niin unau pathum a nei. Kum li mi lek a nih lai atangin tennis a hmelhriat tan a, kum ruk mi a nih laiin Yugoslav tennis player Jelena Genci hnuaiah Tennis a zir tan. Kum 2033 atangin profesional tennis a luh chilh a. Hetih hun lai hi Roger Federer leh Rafael Nadal te vanglai a nih vangin Djokovic hian hlawhtlinna a chang nghal mai lova, Federer leh Nadal te nen an vanglai a innan vangin ‘a vanduai mang e’ tiin a chanchin an sawi thin.
Player ropui pahnihin inelna lian an awpbeh karah Djokovic hi harsa takin a talchhuak a, kum 2008 khan Australian Open-ah a champion ve ta nawlh. Hetihlai hian mipa zingah Federer leh Nadal ni lo Grand Slam-a champion thei awmchhun a ni. Australian Open-ah a champion hnu hian a huangtau chho ta viau a, Grand Slam hrang hrangah a champion ta fo. Player ropui pahnih; Roger Federer leh Rafael Nadal te pawh a hneh thei ta riau a, World No. 1 te a rawn nih chhoh tak hial vangin Federer leh Nadal bakah player ropui dang pakhat a awm belh a. ‘Big Three’ tiin Federer, Nadal leh Djokovic te hi sawi thin an ni ta. Hun a kal zel a, French Open 2023 a zawh meuh chuan Djokjovic chu Federer leh Nadal te chungah chuangin Grand Slam-a champion ngun ber a ni ta hial.
Zin kawng hautak
Mipa lamah Grand Slam-a champion ngun ber ni turin Novak Djokovic hian zin kawng hautak zet mai a zawh a, hliamin a tihbuai bakah Covid 19 hripui leng a tuar nasa em em bawk.
Pa luhlul ve tak Djokovic hian Covid 19 hri danna a la duh lo. Hri danna a lak loh vang hian a tuar zui hle nghe nghe. Covid 19 vaccine a lak loh vangin vawi kua zet a champion tawhna Australian Open khelh phalsak a ni lo va, Australia ramah kum thum chhung zin phalsak a ni lo hial bawk. Australian Open 2022 a hmachhawn theih loh laiin he hmunah amah la hneh ngai lotu Nadal a lo champion a, chu chu a zin kawng tihautak leh zualtu a ni zui ta bawk.
Australian Open a hmachhawn theih loh bakah champion lai a nihna Wimbledon 2021 chu cancel a ni ringawt a, US Open khelh phalsak a nih loh bawk vangin Nole hian Nadal-a ropuina French Open chiah hmachhawn tur a nei. Nadal-a ropuina hmunah a champion zo lo.
Kum 2022 khan French Open leh Wimbledon chiah a hmachhawn thei a. A champion na Wimbledon-ah Ranking point hmuh tur tihbo a nih vangin champiom ber hi ranking-ah a tlahniam nghal duai. US-a inelna zawng zawng a hmachhawn theih loh bawk vangin ranking lamah a hniam zual zel. A hniam lutuk loh nan kum danga a khelh ngai loh inelna tenau te te khelin point a khawl keuh keuh a, kum khata chetha zual pariatte inelna ATP Finals khel turin a tling hram a, a champion zui ta hial bawk.
Hlim ni kawl eng
Covid 19 vanga inelna lian tak tak a hmachhawn theih loh hnuin hripui a kiang a, khawvel intheh vengin Djokovic-a tan ngei pawh hlim ni kawl a lo eng ve leh ta.
ATP Finals 2022-ah champion in, he inelnaa champion ngun ber Roger Federer record a nih rual a, hun chhinchhiah tlak a tawng. ATP Finals-ah a champion hnuin thu lawmawm dangin a deng zui leh a, Australia sorkar thar chuan Djokovic an hremna hlipin Australian Open 2023 hmachhawn an phalsak. Australian Open 2023-ah a vawi 10 nan champion in Grand Slam-a Nadal champion zat a nih rual a. French Open-ah ropui taka champion zui lehin, Grand Slam-a champion ngun ber record a siam ta hial a ni.
Rilru paukhauh leh thiam bik ni bawk mah se a thinchhe lutuk hi inelna hrang hrangah a champion tam loh chhan a tling. ‘Thinchhe lutuk lo se Grand Slam-ah vawi 30 a champion tawh mai awm mang e’ tiin thhinchhiat vanga a champion tam loh thu sawi pawh an awm hial. Chuti taka thinchhia chuan Vana Pa entawnin zaidam a zir a, a rilru a puitling ve ta bawk nen a thin pawh a nel ve ta hle. Final boruak sang takah pawh a dawh thei a, a nghak peih a, ropuina a nghakchhuak thin. Vana Pa a entawn hi atan hlimna leh lawmna a ni.
Hnuhma ropui
Tennis-ah hian ropui tehna ber chu Grand Slam a ni a. Grand Slam dawtah chuan ranking a ni leh. Serbian pa huaisen Djokovic hi Grand Slam-ah vawi 23 champion tawhin, mipa lamah Grand Slam-a champion ngun ber a ni mek a. Grand Slam pali-ah vawithum chin champion vek thei awmchhun a ni a. Grand Slam-a champion tawhnate hi, Australian Open (2008, 2011, 2012, 2013, 2015, 2016, 2019, 2020, 2021, 2023), French Open (2016, 2021, 2023), Wimbledon (2011, 2014, 2015, 2018, 2019, 2021, 2022) leh US Open (2011, 2015, 2018) te a ni a. Mipa lamah Grand Slam final khel ngun ber a nih ang ngeiin champion tam ber a ni tel bawk.
Tennis player zingah Grand Slam-a champion ngun ber chu vawi 24 champion tawh Margaret Court a ni. Djokovic hian Margaret Court tluk turin vawi khat champion chiah a mamawh tawh. A lo berah kum hnih chhung chu khawng tha takin a la inlan zui thei tura ngaih a ni a. Djokovic hian Grand Slam-a champion ngun ber ni chungin Tennis a chawlhsan theih a beisei awm.
Mipa lamah Grand Slam-a champion tam ber a nih vangin Djokovic hi Tennis player ropui bera ngaih a ni a, a phu viau bawk. Grand Slam-a champion ngun ber a nih rualin World No. 1 ni rei ber a ni bawk. He thu buatsaih lai thleng hian Djokovic hi chawlhkar 388 chhung zet No. 1 a ni tawh a. Amah hnaih bertu Roger Federer aiin chawlkhar 78 zetin No. 1 a ni rei tawh zawk a, hun eng emaw chen chhung chu No. 1 a la ni rih dawn bawk a, a record hi khum har viau tura ngaih a ni. Chawlhkar ang zawnga chhuta No. 1 ni rei ber a nih bakah hian No. 1 ni chunga kum hmang liam ngun ber (Year end no. 1) a ni tel bawk a. Nole hian No 1 ni chungin vawi sarih ngawt kum a khar tawh a, amah hnaih bertu chu Tennis chawlhsan tawh Pete Sampras a ni.
Grand Slam a champion ngun ber, World No. 1 ni rei ber leh No. 1 ni chunga kum hmang liam ngun ber a nih bakah hian inelna lian ATP Mastera pakuaa champion kim vek thei awmchhun a ni tel bawk a. Inlena lian ATP Master pakua-ah hian vawi hnih ngawt a champion vek tawh nghe nghe. Grand Slam lo vekah chuan kum khat chhunga chetha zual pariatte inelna ATP Finals hian ngaihhlut a hlawh leh viau bawk. ATP Finals-ah hian Djokovic hi vawi ruk a champion tawh a, Roger Federer nen champion ngun ber an ni mek.
‘Big Three’ zinga tan hlawh lo ber Djokovic hian hawtu ngah hle mah se a hun laia player ropui tia sawi theihte lakah hnuhma a nei tha zawk mai hi chu sawi nep theih a ni lo. Tennis player zinga tan hlawh ber ang hiala Ngaihtheih Roger Federer nen vawi 50 in hmachhawn tawhin 27-23 in a chungnung zawk a. Rafael Nadal nen vawi 59 inhmachhawn tawhin 30-29 in chungnung zawkah a tang mek bawk.
Djokovic hian tu pawh hmachhawn se a khingpuite a zir chak em em a, an thiam zawng leh an thiam loh zawng a hriatsak zung zung thin. Tu pawh hmachhawn se set khatnaah a khingpuite zir chian nan a play kual vak a, a tum lawk ang ngeiin set khat a zawh meuh chuan an khingpuite chakna lai leh chak lohna lai a duh angin a hrechiang hman thin. Tichuan, inringtawk taka khel zuiin a chak leh nge nge thin.
World no 1 hlui Andy Roddick chuan ti hian Djokovic chungchang a sawi. “First he takes your legs… Then he takes your soul”. Roddick thusawi hi Lusei tawng chuan ‘A sawp chau hmasa zet ang che nga, i thinlung a hnehsak zui leh nghal ang che’ tihna ang a ni. Chumi awmzia chu Djokovic hian a khingpuite a sawp chau hmasa te te a, a sawp chauh zet hnuah a duh ang thalin a tir kual a, a duhna lamah hnukin, a hneh zui ta thin a ni. A elpui thiamna nei tha tak tak leh thahrui nei tha tak takte pawh Djokovic hian a thlaudai a, a hneh leh mai thin, chu chu mi bik a nihna a ni.
GOAT a ni em?
French Open 2023-ah champion khan Novak Djokovic hi Tennis player piang tawh zawng zawng zinga ropui ber ‘Greatest of all time (GOAT) ah ngaih a ni nghal thup. A hnuhma hnutchhiah hrang hrang enin GOAT nih hi a phu viau bawk.
Khawvelin Tennis GOAT ang hiala an ngaih Djokovic hi ‘GOAT i ni em? tih zawh a ni a. “Hetiang chungchang sawinaah hian ka inhnamhnawih duh lem lo va, mi dang sawi turah ka dah mai. Sulhnu ropui hnutchhiah turin ka bei a, ropui ber tia insawi tur ka ni lo. Chu lam chu mi dang sawi tur a ni”, tiin a chhang.
“Ka naupan lai chuan engtikah emaw chuan Wimbledon champion niin, World No. 1 te ka la ni ve ang tiin ka suangtuah ve thin. Tunah chuan he hmun hi ka thleng ta. Naupang duhawm tak takte te pawhin in hma lam hun tur tha takin insiam thei, siam rawh u”, Champion trophy a lak hnuah fuihna thu Djokovic hian a sawi bawk.
Tennis ngainatu tam takin ropui bera an ngaih Roger Federer chu Grand Slam 20 lain a chawl tawh a. Grand Slam-a vawi 22 champion tawh Rafael Nadal chuan kum 2024-ah Tennis chawlhsan a tum ve ta bawk. Hliamin a tihbuai mek Nadal hi ranking-ah a tlahniam viau tawh a, World No. 133 a ni mek. Uaithlak lam tawhah hliamin a tihbuai Nadal hi Djokovic el phak khawpin a thochhuak leh zo ang em tih rin thiam a har hle. Federer leh Nadal te boruak daih tawh lamah Djokovic erawh chu hneh theih loh ang maiin a la tlo tlut thung a. Venthawn nei hauh lovin ‘Tennis player ropui ber’ kan tih hun a thlen nge nge a rinawm.