INDIA bloc ten SP MP thehchhuak thei

Opposition te chuan Faizabad MP leh Samajwadi Party leader Awadhesh Prasad chu Deputy Speaker atan an thehchhuah rin a ni. Lok Sabha Speaker thlanna neihah khan Congress leh Trinamool Congress te chuan ngaihdan inang lo an nei a. Chuvangin, tunah chuan Opposition te chuan inthurual taka chet lak an tum ta a ni.
Constitution-in a phut chungin 17th Lok Sabha khan Deputy Speaker a nei lo va. Tunah pawh 18th Lok Sabha-ah sorkar lai mek chuan Deputy Speaker hnawhkhah tumna a la lantir lo bawk.
Article 93 of the Constitution chuan Lok Sabha chuan ‘a rang thei ang berin’ Deputy Speaker a thlang tur a ni a ti a. Mahse, a hun chiah a bituksak lo thung.
Opposition INDIA bloc a party lian pathum Congress,Trinamool leh SP te chuan informal talks nei tawhin tangruala candidate siam ni se an ti tia sawi a ni.
MP zing atangin MLA tum kua ni tawh leh MP a Faizabad Lok Sabha seat a BJP MP Lallu Singh khing thlatu ni bawk Prasad chu an thlang nia ngaih a ni a. Faizabad hi Ram Temple awmna Ayodhya niin BJP ten chak ngei an inrinna mahse an chaklohna a ni.
“Prasad chakna khan BJP te Hindutva agenda hneha a awmzia a pholang a ni. Dalit leader a ni a, tichunga general seat a chakna a chang kha Indian political history a thil chhinchhiahtlak a ni” tiin Top Opposition leader pakhat chuan a sawi a. Sorkarin July 3 a Parliament session hmasa ber tawp hmaa Deputy Speaker chung chang sawi an nei lo a nih chuan Opposition te chuan Lok Sabha speaker hnenah an thlen dawn tia sawi a ni bawk.
Deputy Speaker chuan Speaker legislative power a tawm ve vek a. Speaker awm loh, thihna emaw damloh leh thil dang vang pawh ni se Deputy Speaker chuan administrative power a chang nghal a ni. Parliamentary convention ang chuan ruling party ni lo MP Lok Sabha Deputy Speaker atana thlan thin a ni a, hei hi democratic parliament humhim zel nana tihdan mawia ngaih a ni.
Tih thin dan angah chuan Opposition party zinga lian ber te tan Deputy Speaker chu hualsak thin a ni a. Mahse, ziaka awm a nih loh avangin kum 2014 khan Narendra Modi term hmasa berah khan BJP te chuan an thawhpui AIADMK MP Thambi Durai hnenah an pe a.
Kum 2004 leh 2009 a Congress kaihrhuai UPA sorkar lai khan Shiromani Akali Dal MP Charanjit Singh leh BJP MP Kariya Munda ten an chang a. Atal behari Vajpayee sorkar lai khan Congress MP P.M. Sayeed an a luah ve thung.