India goal thun-khawl Lalthantluangi!

India goal thun-khawl Lalthantluangi!
Indian junior women’s hockey team-te’n European tour an kalpui mekah nimin khan a vawi thumna’n Antwerp khelmualah mualneitu Belgium team bawk an hmachhawn leh a, a zawna a vawi thumna atan anni aia world ranking-a sang zawk leh mualneitu ni bawk chu 3-2-in Mizo tleirawl pahnih telna India team hian an hneh leh a, Kanghmun South tleirawl Lalthantluangi bawk a langsar leh!
He inkhelah hian tan atanga minute 4-naah Sonam chuan India goal khatna a thun nghal a; chumi hnu minute 32-naah he tour-a match thum an khelh chhunga a goal thum khungna ni turin Lalthantluangi bawkin India goal hnihna hi penalty corner atanga ball chhuak atangin a thun.
3rd quarter-ah hian Belgium chuan na takin an nawrlet a, Marie Goenns (37th) leh Marte Marie (40th)-te’n goal khat ve ve thawhin an si phurh an sut zo der!
He mi chinah hian Indian player-te tha a tho tan chiah emaw tih turin an han nawr zui leh sak a, minute 51-naah Kanika Siwach chuan India goal thumna leh an chakna goal ni nghal a thun zui ta a ni.
India team hian vawiin an match 4-naah FIH junior women’s world ranking-a number five luah mek Australia an khel leh dawn a ni.