India hmasawnna atana NE tih hmasawnna turah Mizoram tel – DoNER minister

India ram hmasawnna atan hmarchhak hmasawn tir a ngai a, chumi tur chuan sawrkar laipuiin theihtawp a chhuah a, Mizoram pawhin chu chu a dawng mek tih DoNER minister Jyotiraditya M Scindia chuan a sawi. DoNER minister hi langin Ningani khan Mizoramah a rawn kal a. Chief minister Lalduhoma hoin Ministry of Development of North Eastern Region (DoNER) kaltlanga Mizorama hnathawh hrang hrang an thlirho.
Hemi hnua thuthar thehdarhtute a kawmnaah Jyotiraditya M Scindia chuan, Asia chhimchhak nena inpawh tawnna turin India hmarchhak state chu a kawngkapui a ni a, hei hi India economy nghawng tur thil a nih avangin hmarchhak state tih hmasawn a, kalkawng pawimawha siam turin sawrkar laipui chuan theihtawp a chhuah mek tih a sawi.
Hmarchhak state pum tan leh Mizoram bik tana Prime minister Narendra Modi kaihhruai sawrkarin hma a lak dan a sawi a. Kum 2004 atanga 2014 inkara Mizoram-in hmasawnna atana central atanga sum a dawn zat a sawi. Hemi chhunga sum dawn hi a leta pung a nih deuh vek bakah hmalakna thar awmte a sawi a ni.
PM Modi kaihhruaina hnuaia hmarchhak leh Mizorama hmasawnna, kawngpui, airport, rel kawng, hmasawnna ruhrel dang, inbiakpawhna lama tan lak dan leh hmasawn dan a sawi bawk.
Zawhna chhangin DoNER minister chuan oil palm chin lamah Mizoramah hmathar lak tumin ruahmanna a awm a, Mizoram chu ‘oil palm centre’ ni thei tur khawpin hma lak tum a ni tih a sawi.
DoNER minister thutpuitu chief minister Lalduhoma chuan Jyotiraditya M Scindia hian kalphung thar a duh leh hna thawk cham mi a ni tiin, a ministry enkawlah system thar a tichhuak teuh tawh a. Mizoram pawh min puih inhuam em em reng a nih angin an tangkaipui em em tih a sawi. Tuna Mizorama a rawn kal pawh an hlawkpui hle a, lokal lo se kan neih loh tur kan neih phah theih a awm nual dawn tih a sawi a ni.