India-in a pawmpui ngei kalh zawngin a che leh
United Nations-ah tualto hnamte humhimna dan pass a nih dawnin India chu a duh lama vote tu a ni a, ramri hung a tum leh Free Movement Regime tihtawp a tum leh si chu, a thil pawmpui kalh zawngin amah bawk a che leh tihna a ni tih ZORO chuan an sawi.
Zo Re-unification Organisation (ZORO) hruaitute sawi danin, UN Declaration on the Rights of Indigenous Peoples 2007 Article 36(1) ah hian “Tualto hnamte, a bikin khawvel sawrkar ramri khamin a thendarhte chu an inkalpawhin an intanpui anga, sakhaw thil leh khawtlang thil, ei leh bar leh politics-ah anmahni mi leh sate nen inpawh a, sawiho theihna dikna chanvo an nei a ni” tih leh, “Ram roreltute chuan tualto hnamte nen inbe rawnin, he dikna chanvo hi tipuitling turin hma an la ang,” tih a ni.
He dan pass a nih lai hian India chuan a duh lamah vote a pe a, tunah erawh a kalh zawngin hma lak a tum mek tih an sawi a. Khawvel ram dang pawhin India sawrkarin he dan a bawhchhia hi an dem tih an sawi.
India sawrkarin FMR tihtawp a tum leh ramri hung a tum chu a tawp thlengin a dodal dawn tih sawi nawnin, hemi chungchang hi Nagaland Indigenous People’s Forum leh ZORO chuan kumin March 16 khan sawihoin thawhhona thuthlung (MoU) an ziak a, duh lohna lantirna atan India-Myanmar ramri-ah peaceful rally nei turin hurolum an siam tih an sawi a ni.
ZORO chuan May 16 hian hmalakna hmasa atan Zokhawthar leh Vaphaiah FMR thiah leh ramri hung duhloh lantirnan peaceful rally an huaihawt dawn a. Hemi ni ah vek hian Nagaland- Myanmar ramri-ah leh Manipura Naga luah chin leh Zofate luah chinah peaceful rally hi neih bawk tur a ni, tiin, Mizoram (India) Myanmar ramri hrul khua zawng zawngin zawm ve a, peaceful rally huaihawt theuh turin an ngen tih a sawi. Zoram mipui zawng zawng kan ram leh hnam tan a ni tih hria a, tel turin an sawm tih an sawi a ni.
Mipui zingah ruihhlo tawlhruk leh dan loa chetna hluar avangin ramri hung duh pawl an awm nia sawi chungchanga zawhaah ZORO hruaitute chuan, ramri hung a nih pawhin dan loa chetna leh suahsualna chu a awm reng dawn a, hnam chu a chak zawk turah an ngai a, ramri hung duhtute pawh Pathianin an rilru a hneh mai turah an ngai tih an sawi.