India-in Afghanistan laka Pakistan chetna dem

India-in Afghanistan laka Pakistan chetna dem
Pakistan-in Afghanistan beia mi eng emaw zat thihna thleng chu India chuan na takin a dem.
Pakistan chuan an sipaiten Afghanistan-ah hian hel 70 vel an that tih an sawi a. Hetih lai hian Kabul erawh chuan khawchhak lama Nangarhar leh Paktika province-a ‘civil mite chenna hmun tam tak’ beihnaah hian mi 18 an thi niin an sawi ve thung tih Associated Press-in a tar lang.
“India chuan thla thianghlim, Ramadan laia van sang atanga Afghan ram chhung beia naupang leh hmeichhia tela mi thahnem tak thihna a thleng hi a dem tak zet a. Hei hi Pakistan-in an ram chhung buaina pawn lama tihchhuah a tumna leh bawk a ni,” tiin Indian foreign ministry thupuangtu, Randhir Jaiswal-a’n thuthar lakhawmtuten an zawhna a chhang.
Indian foreign ministry chuan Afghanistan ram hran nihna, inrelbawlna hrang leh ram pakhat a nihna chu a thlawp tlat tih a sawi bawk.
Islamabad chuan an sipaite chet chhuahnaah hian Pakistani helte tawmna hmun bitum a nih thu a sawi a. Afghan defence ministry erawh chuan civil mite chenna leh madrassa eng emaw zat kah fuh a nih thu sawiin an thenawm ram chet dan chu Afghanistan chung boruak leh ram hrang nihna palzutna chiang tak niin a sawi ve thung.
Pakistani Deputy Interior Minister Talal Chaudhry chuan Geo News hnenah hel 70 vel an thih thu a sawi a, finfiahna erawh à la awm thei rih lo.
Afghan sorkar thupuangtu, Zabihullah Mujahid chuan beihnaah hian hmeichhia leh naupang telin ‘mi tam tak thi leh hliam an awm’ tih X-ah a tar lang a. Pakistan-in hel 70 an thi nia a puan chu ‘a dik tawk lo’ tih a tar lang bawk.
Nangarhar-a Afghan Red Crescent province director, Mawlawi Fazl Rahman Fayyaz-a an province-ah mi 18 an thi a, mi dang tam takin hliam an tuar niin a sawi bawk.
Beihna an tawh hnuah Afghan foreign ministry chuan Kabul-a Pakistani palai a ko nghal a. “Afghanistan chung boruak palzuta civil mite beihna a thleng hi Afghanistan inpumkhatna leh boruak tha lo siamtu a ni,” an ti.
Beihna a thlen hnuah Nangarhar province-ah chuan mipuiin thil chhia senghawiin thite vui turin an inbuatsaih zui a, tual chhung mi pakhat chuan tute mah Taliban emaw, hel emaw thi an awm lo tih AP hnenah a sawi.