India-in Dhaka-a Durga temple tihchhiat dem

India-in Dhaka-a Durga temple tihchhiat dem
India chuan Bangladesh khawpuia Durga temple tihchhiat a ni chu tha lo a tih thu leh Dhaka-a sorkar lailawk ding me chu an rama tlem zawk, Hindu leh an hmunhmate hum tura hna thawk tha lovah a puh.
External affairs ministry thupuangtu, Randhir Jaiswal-a chuan Ningania thuthar lakhawmtute a kawmnaah August thlaa Bangladesh-a Sheikh Hasina-i sorkar paih thlak a nih hnu leh Nobel Prize dawng tawh, Muhammad Yunus-a kaihhruai sorkar lailawk a din hnuah ram pahnih inkar a that tawk loh thu a sawi a. India hian a hma pawhin sorkar lailawk hi Bangladesh-a sakhaw zuitu tlem zawk laka tharum thawhna thleng thin avangin a lo sawisel tawh thin.
India leh Bangladesh hian kar tina thuthar lakhawmtute a kawmnaah nakuma tawp tawh tur, Ganga Water Treaty 1996 sawi dun an tum tih Jaiswal-a chuan a sawi a. New Delhi chu hmei atan hian inbuatsaih mekin khuarel thilah hian ram hnihin an hlawkpui theih tur ang chhawp chhuah a tum tih a sawi.
Jaiswal-a Bangladeshi thuneitute chu Dhaka-a Durga temple tihchhiat chungchangah demin, “Khilkhet, Dhaka-a temple hi kal firfiak pawlten an tichhia a ni tih kan hria,” a ti.
“Sorkar lailawk hian temple humhim aiin dan lova ram hman chu la vawng zawkin vawiin (Ningani) hian tihchhiat a phalsak a ni,” a ti.
Jaiswal-a chuan Bangladeshi sorkar lailawk chu Hindu, an thil neih leh an hmunhmate humhim tura mawhphurtu an nih thu a sawi bawk.
Ganga Water Treaty tihnun zel dan tur chungchang zawhna chu chhangin India leh Bangladesh hian ramri kân lui 54 an intawm a, heng zingah hian Ganga a tel tih a sawi a. “He thawhhonaa thil pawimawhte kan sawiho dawn a, ram pahnihin sawiho theihna tur, Joint Rivers Commission kan nei a. A kaihhnawih state sorkar pawh rawn an ni tawh a, keimahni bik pawh kan inrawn a, ruahmanna siam mek zel a ni,” a ti.
“Ram pahnihin kan hlawkpui theih tur inbiakna a awm theih nan Bangladesh dawr turin kan inbuatsaih mek a ni,” a ti.