India in Pakistan an sawp

South Asian Football Federation Championship (SAFF Championship) chu June 21, Nilaini khan Bengaluru-ah khelh tan a ni a. Champion lai India chuan tha taka bul tanin, nilai zana an khingpui Pakistan chu si li faiin an hneh. India tan hian captain Sunil Chhetri chuan hattrick a siam.
India hian Group A-a an elpui lian tura ngaih Pakistan hi Sree Kanteerava stadium-ah an hmachhawn a, an trophy kawl mek humhim an tumna kawngah tha takin bul an tan. Pakistan lakah hian minute 16 chhung lekin goal hnih an thun hman, chawlhlawk hnu lamah goal hnih an thun belh leh bawk.
Inter Continental Cup champion thar India hian an mualah Pakistan hneh ngei tumin tan an khawh a, mipui thlawpna tha tak nen bul an tan tha hle. Inkhel tan atanga minute 10-na lekah ho taka Pakistan si nghak Saqib Hanif chetsual vangin India captain Sunil Chhetri chuan awlsam takin a pet goal a, hmahruaina goal a thun. Hmahruaina goal an thun atanga minute rukna lekah India hain penalty an hlawhchhuak zui leh nghal. Hanif hand ball vanga penalty an hmuh hi goal hmahruai thuntu Chhetri chuan harsatna tawk lovin a pet goal a, an goal hnihna a thun zui leh.
Team indinthar mek Pakistan hi hma takah goal hnih an chhuah vangin an buai zui a, an hmelma lian India lakah goal thun tur khawpin an insiamtha thei lo. Ram pahnihte hi inhal em em reng an nih vangin inkhel boruak pawh a tang tha at at viau a, chawlhlawk hmain an inbakkaih nasa teuh hle a, India head coach Igor Stimac hnawhchhuah a ni hial nghe nghe. Lalianzuala Chhangte telna India hian an mikhualte nawr zui viau mah se, chawlhlawk hmain goal dang an thun belh thei tawh bik lo.
Chawlhlawk hnu lamah pawh inkhel a hmuhnawm zui zel a, Pakistan in goal thun ngei tumin tan an khawh a, India hi goal thun belh ngei an tum ve bawk. Goal lut a awm belh theih lawk loh hnuin India in goal an thun hmasa leh. Minute 74-naah India hian penalty an hlawhchhuak leh a, Sunil Chhetri chuan ama hlawhchhuah penalty chu chiang taka pet goal in an goal thumna a thun a, hattrick a siam. Chhetri-a’n hattrick a siam hnu lawk hian fuh taka ball inpe in, Pakistan tlarhnung an that chiang hle. Fal taka ball um fal Udanta Singh chuan minute 81-naah an goal lina a thun a, an hmelma lian Pakistan lakah awlsam taka chakin, point thum an hmu nghal.
Pakistan laka hattrick siam Sunil Chhetri khan ram tan goal 90 a thun tling ta chiah a, mel lung pawimawh a phun belh zel. Chhetri hi Asia player zingah ram tan goal thun hnem ber dawttu a ni thar a, goal thum a thun hmang khan Malaysia tana goal 89 thun tawh Mokhtar Dahari a lehpel a. A chungah hian Iran tan goal 109 zet thun tawh Ali Daei a awm mek. Asia player zingah ram tan goal thun hnem ber dawttu a nih rualin khawvela footballer zawng zawng zingah ram tan goal thun hnem palina a ni thar bawk a. A chungah hian Lionel Messi, Ali Daei leh Cristiano Ronaldo te an awm.
Group A-a inkhel dangah Kuwait chuan an khingpui Nepal chu 3-1 in an hneh a, point thum an hmu ve bawk. Kuwait tan hian Khalid Ebrahim, Shabaib Al-Khaldi leh Mohammad Daham ten goal khat theuh an thun.
SAFF Championship
SAFF Championship hi kum 30 kal ta kum 1993 atanga khelh tan a ni a. ‘SAARC Gold Cup’ leh ‘SAFF Cup’ ti tein hriat thin a ni. He inelnaah hian vawi riat champion tawh India chu champion ngun ber an ni a. India hi champion lai an ni mek bawk. India bakah hian Maldives chu he inelnaa hnuhma nei tha ber niin vawi hnih an champion tawh a. Bangladesh, Afghanistan leh Sri Lanka te vawi khat theuh an champion tawh bawk.
SAFF championship 2023 hi Sri Lanka chuan thlen an duh viau a, inelna thlengtu tur thlan a nih lai hian Sri Lanka hian FIFA hremna a tawrh mek vangin inelna a thleng thei lo. Nepal in thlen dil ve leh bawk mah se India-ah nghah a ni ta zawk. Nilai zan atanga inelna neih tan takah hian ram pariat an tel a. Group A-ah India, Kuwait, Pakistan leh Nepal te an awm a. Group B-ah Lebanon, Maldives, Banglandesh leh Bhutan te an awm ve thung. Ram pariat inel zingah Lebanon hi FIFA ranking-a sang ber an ni a, India chu pahnihna an ni.