India-in Rafale Jets 26 lei dawn?

India chuan tuipui lama a hman tur Rafael Jetfighter 26 leh a kaihhnawih bungrua te France hnen atanga lei turin ruahmanna a siam leh ta.
India sorkar chuan French sorkar hnenah ngenna siamin Rs.50,000 crore sensona tur hi pawmpui hram turin a ngen a ni. He ruahmanna siam hian mi pakhat chauh thut theihna, single seat jets 22 leh mi pali thut theihna leh ralthuam, spare, pilot training leh mamawh hrang hrang phur theitu jets 4 te an ni.
He jets lei phal dilna, Letter of Request (LoR) hi Indian Defence Ministry-in French Directorate General of Armaments hnenah a lo pe tawh a. He LoR hi October ni 10-11 chhunga India Defence Minister Rajnath Singh-an France a tlawh hnu lawka chhuah a ni.
Times of India sawi danin, “Tun atanga thla rei lo teah hian France chuan India hnena hralh tura a tih ang apiang – a man te, leh tul dangte a rawn ti chiang ang. Jets atana senso tur te inremsiam a nih hunah Cabinet Committee on Security remtihna lak leh a ni anga kum thum chhunga in lei fel tura hmalak nghal a ni ang,” tiin a sawi a ni.
Mazagon Docks (MDL) pawhin French M/s Naval Group te nen Lawng lian Scorpene diesel-electric hmang Rs.3,000 crore senga sak tur inremna an siam chho ve tan mek bawk a. India-a Lawng lama hotu lu ber ber te chuan lawng lian chungchang hi sawihoin lawng pumpui za zela 60 chu India siam ni thei se an duh thu te an sawi, tih Times of India chuan a sawi a ni.
He fighter jet leh Lawng lian lei phalna chungchang hi July 13,2023 khan Rajnat Singh-a kaihhruai Defence Acquisition Council chuan a lo pawm tawh a, hei hi Modi leh Macron ten Paris-a an inbiak hma ni chiah a ni.