India in semi-final an lut

Inrinni zana SAFF Championship 2023 khelhah India chuan si hnih faiin Nepal an hneh a, semi-final an lut. India rual hian si li faia Pakistan sawptu Kuwait chuan semi-final an lut ve bawk. India leh Kuwait hian group champion nih an inchuh chhunzawm ang.
Kanteerava, Bengaluru a inkhelah hian India in a thenawm ram Nepal lakah an khel tha leh viau a, inkhel tan phat atangin ball chang tam zawk leh hlauhawm siam tam zawkah an tang char char. India hian chak nawn leh ngei an tum laiin an khelh hmasak bera tlawm tawh Nepal in semi-final luh phak beisei chhunzawm turin chak an beisei ve a, thih leh thih, dam leh dam tiin mualneitu India an hmachhawn ve bawk a, inkhel hmuhnawm an lantir.
Inter Continental champion thar India hian an mikhualte nawr viau mah se goal an thawkchhuak lawk thei lo. Darkar khat chuang zet goal an thun theih loh hnuin minute 62-naah India captain Sunil Chhetri chuan hmahruaina goal a thun ta nge nge. Chhetri hian India tan goal 91 a thun tling ta chiah a, ram tan goal thun hnem palinaah a awm chhunzawm zel. Hmahruaina goal an thun hnuin India hi inrintawkna sang zawk nen an intlan chhunzawm a, goal pawh an thun belh leh thuai bawk. Si hnih phur tawh Nepal hian an si phurh sut then tum viau mah se hun tawp thlengin goal an thun thei lova, si hnih faiin tlawm zawkah an tang.
Si hnih faia Nepal an hneh vangin India hian khelh hnih atangin point ruk an hmu a, semi-final khel turin an tling chiang nghjal. India hian khelh hnih atangin point ruk an hmu a, semi-final-ah tha zawka an khingpuite hmachawn turin hma lam an pan. Minute Sunil Chhetri goal thun hnu hian Igor Stimac-a naute an khel tha chhunzawm zel zual an goal pawh an thun beleh leh thuai. Minute 70-naah Naorem Mahesh Singh chuan an goal hnihna a thun zui leh am an mualah si hnih faiin an chak chhunzawm ta a ni.
Nepal lakah an chak leh tak vangin India hian an trophy kawl mek humhim an hnaih deuh zelh a, semi-final an inhlangkai der tawh, India leh Kuwait ten khelh hnih atangin point hnih an hmu ve ve a, semi-final lut dunin, group champion nih an inchuh zui leh ang. India hmachhawn zui leh tur Kuwait hian inrinni zana an khingpui Pakistan chu si li faiin an sawp.
An khelh hmasak bera Nepal hneh nghaltu Kuwait hian Pakistan lakah bul an tan tha viau a, inkhel tan atanga minute 10-na lekah Hasan Hamdan Al-Anezi chuan hmahruaina goal a thun nghal. Hma taka goal an thun vangin inrintawkna sang zawk nen an inlan chhunzawm a, goal pawh an thun belh leh thuai. Minute 17-naah Mobarak Al Faneeni chuan an goal hnihna a thun belh a. An goal hnihna a thun hnuin Mobarak Al Faneeni hian minute 45+1-ah an goal thumna a thun belh zui leh a, si thum faia hmahruai chungin chawlhlawk an hmang.
Chawlhlawk hnu lamah Kuwait an khel tha chhunzawm a, minute 69-naah Eid Al-Rashidi chuan an goal lina a thun a, goal dang luh belh lovin inkhel a tawp a, si li faia chak Kuwait in semi-final an lut. Kuwait leh Indian hi thawhleh zan dar 7:30-ah an inhmachhawn ang a, a chak zawk zawkin group champion ni chungin semi-final an hmachhawn ang.