India-in tuialhthei min dawr tlem hi a rei dawn lo – Russia

India-in tuialhthei min dawr tlem
hi a rei dawn lo – Russia
Kremlin thupuangtu, Dmitry Peskov-a chuan India-in Russian tuialhthei a leisak tlem chu ‘hun rei lo te atan’ chauh a nih thu sawiin Moscow-in tam zawk an pek theih dan tur ruahman a nih thu a sawi a. Tuna an kal dan chu khawthlang ramten an hrekna tur lo tihkawina chauh niin a sawi.
President Vladimir Putin-a’n Ningani atanga ni hnih chama New Delhi a tlawh dawn lai mekin Peskov-a hian a sawi a, India hian Russian tuialhthei a lei chu tun thlaah nasa taka titlemin kum thum vel chhunga a leisak tlem ber tum a ni.
Russia-in tuialhthei a hralh leisak tam ber, India hi Moscow atanga a lak luh avang hian khawthlang ram, a bikin Washington chuan hrekah an vau nasa a. Rosneft leh Lukoil atanga a lei thin a titlem mek a ni.
“Hun rei lo te atan chauh a ni a, hei hian tuialhtheia sumdawnnaah nghawng a nei pha lo,” tiin Peskov-a hian Thawhlehnia Indian chanchinbu mite zawhna a chhang.
Khawvela tuialhthei hmang tam ber leh ram dang atanga la luh tam ber pathumna, India hi Russia dawr tam ber ram a ni.
Russia-a Sputnik news agency-in video link hmanga inkawmna a buatsaihah Peskov-a chuan Moscow chuan a tuialhthei leisak duhten ‘tha taka an lei theih nan’ ruahmanna an nei tih a sawi.
“Dan lova inhrekna ang chi kalpui lo hmachhawn tur hian tawnhriat kan ngah tawh,” a ti a. “Tih dan tur bik keimahniin kan nei a, hreknain awmzia a awm miah lohna tur kal dan kan nei a ni,” a ti.
Russia leh India inkara insumdawn tawnnaah ram dang an inrawlh tih sawiin pawisa inpek dan tur chu an hruaitute inbiaknaah an sawi dawn tih a sawi.
Indian tuialhthei thlifimtu thenkhat – Mangalore Refinery and Petrochemicals Ltd, Hindustan Petroleum Corp leh HPCL-Mittal Energy Ltd chuan Russian tuialhthei hi an lei tawh rih lo.
Sorkar hnuaia Indian Oil Corp erawh chuan hrek loh china lei turin a chah tawh a, Bharat Petroleum Corp pawhin lei turin indawrna an kalpui mek bawk.
Russia puihnaa din, a neitu nihna pawh Rosneft-in an neih ve, Nayara Energy chuan British leh EU hrekna avanga an chah sa thawn let mah se chah thar an tum mek bawk.
Russia dawr tam bertu ni thin, Reliance Industries Ltd chuan October 22 khan an lo lei sa tawh phurh chhuah niin November 20-ah a thleng dawn niin an sawi bawk.