India junior hockey team-ah
Mizo tleirawl pahnih an tel
Tun December ni 7-15 chhunga Oman khawpui Muscat-a 2024 Women’s Hockey Junior Asia Cup khel tur India team-ah Lalremsiami hnungzui tura ei tling chho mek Mizo tleirawl pahnih defender Lalthantluangi (Kanghmun South) leh forward Lalrinpuii (Hnahthial) an tel
Anni pahnih hi hmanni lawka Europe tour-ah pawh khan India tan an lo feh chhuak tawh a; Arab rama India-in a title kawl lai humhim tuma a chetchhuah tuah pawh an tel zui zel a ni.
Hockey Mizoram chuan India tan tha taka khel tur leh tun aia sang zawk thleng turin Mizo tleirawl pahnihte hi duhsakna a hlan a, India tana inlan thei khawpa player tha an lo chhuak zel chu an chhuang tih thuchhuah siamin an tarlang.
Defending champion Indi a hi captain Jyoti Singh hoa inlan tur niin, Sakshi Rana chu vice-captain atana ruat a ni.
He tournament hi FIH Hockey Junior World Cup 2025 khel tur zawnna (qualifiers) a nih nghal avangin India tan a pawimawh hle a ni.
India hi Pool A lamah China, Malaysia, Thailand, leh Bangladesh-te nen awm hoin, Pool B-ah South Korea, Japan, Chinese Taipei, Hong Kong China leh Sri Lanka an bawrkhawm ve thung.
Coach Tushar Khandker chuan experienced player rual leh young talent inchawhpawlh a nih avangin a squad a rintawk thu a sawi.
India hian December ni 8 hian Hockey Oman Stadium-a an group match hmasaberah thenawm Bangladesh an tum ang.
2024 Women’s Hockey Junior Asia Cup hi Women’s Hockey Junior Asia Cup vawikuana niin, Asian Hockey Federation buatsaih Asia khawmualpuia women’s international under-21 field hockey championship a ni.
-- Advertisement --
Indian Junior
Women’s Team
Goalkeepers: Nidhi, Aditi Maheshwari
Defenders: Manisha, Jyoti Singh, Lalthantluangi, Pooja Sahoo, Mamata Oram
Midfielders: Vaishnavi Vitthal Phalke, Sunelita Toppo, Ishika, Rajni Kerketta, Sakshi Rana, Khaidem Shileima Chanu
Forwards: Deepika, Beauty Dungdung, Kanika Siwach, Mumtaz Khan, Lalrinpuii
Alternate Players: Binima Dhan, Himanshi Sharad Gawande