India kutah 5th Asian Champions Trophy hockey title tlulut leh

India kutah 5th Asian Champions Trophy hockey title tlulut leh
Paris OIympics 2024 zawh fel taka bronze medal latu Indian men’s hockey team chuan Thawhlehni zan khan sikhat faia tournament thlengtu People’s Republic of China hnehin 5th Asian Champions Trophy (ACT) title an kawl lai an humhim a; India rama hockey thuneitu sang ber Hockey India chuan player mal tin leh support staff zawng zawngin pawisa fai thahnem tak an dawn vek tur thu an puang nghal.
Hulunbuir khuaa Moqi Hockey Training Base-ah ACT 2024 final hi khelh niin, goal awmchhun hi minute 51-a Jugraj Singh tihluh niin, champion lai India chuan Asia khawmualpuia hockey team tha ber an nihna an nemnghet nawn leh.
India leh China hi tournament bultanna inkhelah intawng tawhin, Harmanpreet Singh and Co. hian sithum faiin mualneitu team hi an lo hneh tawh a; final-ah China hian tan phat atangin Indian defence lakah ‘pressure’ na tak an siam nghal a, mahse, a tawpa hnehna changtu chu India leh bawk niin, final-ah hian captain Harmanpreet Singh chu ‘Hero of the match’ atan thlan a nih bakah goal sarih thuna India top scorer hi ‘Player of the Tournament’ atan thlan a ni nghal bawk.
India hian Asian Champions Trophy 2024-a an game khelh zawng zawngah hnehna chang fai vekin, match sarih an khelhah goal 26 an thun a, goal nga chiah an chhuah!
Tarlan tak angin, Hockey India chuan player tin hnenah cheng nuai thum theuh an pek tur thu leh support staff member pakhat zelin cheng nuai 1.5 an dawn tur thu an puang.
Olympics 2024-a an bronze medal kawl lai an humhim leh hnuah kumin hi Indian men’s hockey team tana kum tha a nihna China ram Asian Champions Trophy-ah an lantir chhunzawm a; player-te pawhin sum lamah hlawkpuiin, Paris Olympics 2024-a pathumna an nih avang khan Ministry of Youth Affairs and Sports atangin India squad-a player tinin cheng nuai 15 theuh an lo dawng tawh a, support staff member tin kutah cheng nuai 7.5 theuh a lut bawk.
Tuntum China ram tournament-a tel zingah forward pahnih Uttam Singh leh Araijeet Singh Hundal-te chu Olym-pics squad-a tel ve lo kha an ni a, tun hi India mipa hockey team behchhana prize money an dawn vawikhatna tur a ni.
Asian ram zinga FIH Outdoor Hockey World Ranking-a top 10 luah pha awmchhun India hi Asian Champions Trophy khelh zawh takah khan champion lai an nih angin an title kawl lai humhim thei tura ngaih an ni a, beisei lawk ang ngeiin tournament an thunun hneh hle.
Group stage-ah ngawt pawh goal 21 khung tlingin, chu’ng zingah chuan 8-1 tehrenga Malaysia an sawp leh final group stage match-a an hmelma kumhlun Pakistan laka 2-1 hnehna an sualchhuah kha telin, semi-final pakhat zawkah 4-1-in South Korea an nawp bawk.
Kum 2011 atanga khelh tan ACT title hmasaber an lak hnuah India hi kum 2016, 2018, 2023 leh kuminah an champion leh a; ACT tournament vawiriat khelh tawhah vawihnih chiah final luh zawh loh an la nei!
India leh Pakistan inhmelmakna thukzia khawvelin a hria a, tuntum at ACT 2024 final match khelh lai pawh khan Pakistan player-te chuan semi-final pakhat zawka an ngam loh China tanin Chinese flag nen Chinese fans bulah tanhmun an khuar!