India leh China inbia, inbiak chhunzawm zel remti

China leh India chuan Beijing-a an palai lawkte an inbiak hnuah ramri chungchangah inbiak chhunzawm zel leh ‘dik, tanchhan tha leh lehlam lehlam tana pawmawm’ siam zel ni se an ti.
Khawvela mihring tamna ber ram pahnih, nuclear ralthuam nei ram ni ve ve hian ramri 3,800 an intawm a, hengte hi Himalaya tlangdung khawkrawk leh chhengchhe tak tak, vur rama kaltlang a nih avangin a chiang lovin ram chin hauhvin an intibuai fo.
Chinese ​Foreign Minister Wang Yi-a leh Indian National Security Advisor Ajit Doval-a te chu ‘thuk tak, tlang tak, inthian tha leh hlim takin’ ramri chungchang leh inkungkaihna an sawi dun tih Chinese foreign ministry chuan Thawhlehnia an inbiakna chungchang thu a chhuah.
Wang-a chuan China-India ​inkungkaihna hi an pahnih tan maia pawimawhna nei ni lovin khawvel huap leh thil pawimawh dang tam tak keng tel a ni tih a sawi a. Inthenawm ram hnihte hi inbiakna kalpui zel leh an ngaihdan inan lohna te tihtlem hret hret a tul tih a sawi.
China-a Indian Embassy pawhin ram pahnih palaite hian inkungkaihna kalpui mek an thlir a, thawhhona huang zauh dan tur leh ramria himna leh muanna a awm theih dan turte an sawi dun tih X-ah a tar lang.
Kum 2020-a ramria an intihbuai hnuah Beijing leh New Delhi inkar hi tun hnaiah a tha chho hret hret zel a, an buai hnuah kum lo chhung zet chu ramri-ah sipai chhawp belhin an inep nasa hle a, October, 2024 khan sipai hnuk kir turin an inrem ta chauh a ni.
Nikum khan Indian Prime Minister Narendra Modi-a pawhin kum sarih hnua a vawi khat nan China tlawhin hei hian an inkungkaihna chhia a titha lehzual a. Tun hnai lehzualah ramriah inbakkaihna an nei leh zeuh va, palaite pawh an intawng na leh hman hle bawk.
“Lehlam lehlam hian hun hmasa lama thil thleng atangin an inzir a tul a, ramri hi inlaichinna siamna kawnga hmun pawimawh luahtu a ni a, inepna, innghirnghona leh inpalzutna tel lova hmalam panpui a ngai,” tiin Wang-a hian Doval-a hnenah hian a sawi niin an ram foreign ministry-in a tar lang.
Ram pahnihte hian kum 2027-ah ramri sawi dun leh an remti bawk tih Chinese thuchhuah chuan a tar lang bawk.
Hetih mek lai hian Chinese ​President Xi Jinping-a chuan thla thara New Delhi-a BRICS summit-ah a thuihhruai thahnem tak nen an tel dawn nia sawi a ni a, a zin a nih chuan kum sarih hnua India a tlawh lehna hmasa ber a ni dawn a. Hei pawh hi an ram inkungkaihna tha leh tihlanna nia ngaih a ni.