India leh US inrem, chhiah lak 18%-ah tihniam nghal

India leh US inrem, chhiah lak 18%-ah tihniam nghal
US President Donald Trump-a chuan India nen sumdawnnaa inremna an pawm tih puangin an bungrua a lak luha chhiah an lak pawh 50% atangin 18%-ah a tihniam tih a puang.
US leh India inkar sumdawnna tilian zual tur leh chhiah lak tihniam tur hian India chuan Russian tuialhthei a lei a titawp a, US atanga leiin Venezuela atang pawhin a lei thei dawn hnai.
“Kan inthian thatna piah lamah Prime Minister Modi-a ka zahna avangin a ngen angin US leh India inkara Trade Deal chu pawm a ni a, US hian Reciprocal Tariff a lak thin pawh 25% atangin 18%-ah a tihniam nghal a ni,” tiin Indian Prime Minister Narendra Modi nen phone-a an inbiak hnuah Trump-a hian Thawhtanni (India-ah zan)-ah social media-ah a tar lang a ni.
White House thuneitu chuan US hian Delhi-in Russian tuialhthei a lei avanga hrem nana an bungrua a lak luha chhiah 25% a laksak chu a hnuk kir vek tih Reuters a hrilh bawk.
Trump-a chuan Modi-a hian an inbiaknaah India-in US energy, technology, lo neihna thil leh thil dang $ tluklehdingawn 500 man lei a tiam niin a tar lang tel.
“Ka thian duh tak President Trump-a nen vawiinah tha takin kaninbia a. Made in India thil chu tunah chuan chhiah lak tihniamin, 18% chawiin thawn luh a ni tawh ang,” tiin Modi-a pawhin X-ah a tar lang a. “Hetiang thil ropui puan a nih theih avangin India-a mihring tluklehdingawn 1.4 aiawhin President Trump-a chungah lawm thu ka sawi tak meuh a ni,” a ti.
US nena inremna siam a nih rual hian sumdawnnaah nghawng lian tak a awm nghal a. IT consulting firm Infosys chu Thawhtanni chawhnu khan trading-ah 3.53%-in a sang nghal a, consultancy Wipro pawh 7% , HDFC Bank-in 3.4% hmuh belhin iShares MSCI India exchange-traded fund chu 3.3%-in a kâng bawk.
US-in January thla tira sipai nena Venezuelan President Nicolas Maduro luhchilha an man hnuah Inrinni khan Trump-a hian India-in Venezuelan tuialhthei a lei theih tur thu a lo sawi thawi tawh.
Khawvela mipui rorelna ram lian ber pahnih inkara inremna hi sumdawnna thila innghirnghona hrang hrangin thla eng emaw zat a tihbuai hnuah siam a ni.
August thla khan Trump-a hian India hi Russian tuialhthei a lei thin titawp tura nawr nan bungrua a laksaka chhiah a lak chu 25%-a tipungin a hmaa 25% a laksak nen 50% a kai a, thla hmasa thla tir khan a lei chhunzawm zel a nih chuan a aia sang pawhin chhiah a laksak dawn niin a sawi zui bawk.
Khawvela tuialhthei lei tam ber pathumna, India tan Venezuelan tuialhthei a lei theih dawn chuan Russia atanga a lei thin a chhawk thei dawn.
India hi tuialhtheiah chuan ram dang atanga a lak luha innghal niin a mamawh 90% vel zet hi a lak luh a ni a. Russian tuialhthei hi man tlawm zawkin a lei a, hei hi Moscow-in kum 2022 atanga Ukraine a rûn meknaa sum a tuakna niin ngaih a ni.
Tun hnaiah India hian Russia atanga tuialhthei a lei hi a titlem hret hret a. January han ni tin barrel maktaduai 1.2 vel leiin February-ah hian ni tin barrel maktaduai khatah tla tura ngaih a ni a. March-ah phei chuan barrel 8,00,000-ah a tla dawn niin Reuters chuan a tar lang.
Washington-in chhiah sang a lak hi Indian sumdawnna pawhin a tuar hman hle a. Sumdawnna ram thang chak ber ber zingah kum 2025 khan a thang muang zingah telin ram dang sumdawngte pawh an luh loh phah hle a ni.