Kum 2021 khan India rama mihausa tawntaw 1% te chuan India mipui 40.5% te neih zawng zawng belhkhawm aiin rosum an ngah zawk niin Oxfam chuan a tarlang.
Kum 2022 khan India ramah billionaire 102 a\angin 166 ah an pung tiin report chuan a tarlang bawk a.
-- Advertisement --
Chutih laiin India mirethei ber ber te chuan dam khawchhuah nan ni tin mamawh tak ngial pawh an nei pha lo a ti bawk.
Oxfam te chuan India finance minister chu intluktlanlohna nasa lutuk thleng mekah mi hausa chungchuangte lakah chhiah sang zawk la turin a ngen zui bawk a.
He report – Survival of The Richest – tih hi Davos, Switerland a World Economic Forum neih hmaa tihchhuah a ni.
Report chuan kum 2012 atanga 2021 chhungin India rama hausakna 40% chu population a\anga chhuta 1% te kutah a lut vek a, 3% chu a hnuai lam 50% ten an insem a ti bawk.
Kum 2022 khan India mihausa ber Gautam Adani hausakna chu 46% in a pung a, India mihausa 100 te hausakna belhkhawm chu $ 660 billion a tling a ni.
Kum 2022 khan Adani chu Bloomberg wealth index-ah khawvela mihausa ber pahnihna a ni a. He mi kum vek hian khawvela hausa chak ber a ni bawk.
Oxfam te chuan India mihausa te aiin middle class leh retheite chuan tax an pe hnem zawk a ti bawk a.
India-in goods and services tax (GST) hmanga a chhiah lakkhawm 64% te chu population atanga 50% te tum a ni a, top 10% te a\ang chuan 4% chauh GST lak a ni a ti bawk.
“Vanduaithlak takin India chu mihausa te chauh awmna ram lam panin a kal mek a ni,” tiin Oxfam India CEO Amitabh Behar chuan a sawi a. “India rama Dalits, Adivasis, Muslim, hmeichhia leh informal sector-a thawkte chu mihausate chauh dinkhawchhuah theihna tur system-ah an talbuai mek a ni,” a ti bawk,.
Mihausa te chu corporate tax tihhniam hlawkna changtu an ni a, tax awl mai bakah incentive hrang hrang an hmu tiin report chuan a tarlang bawk a.
He intluktlanlohna nasa tak tihzim a nih theih nan hian Oxfam te chuan finance minister chu mihausa te laka progressive tax heng walth tax te ang la turin an ngen zui a.
India mihausate lakah 2% lek pawh chhiah lak ni se, India mipui eitur tlachhamte kum thum chawm theihna a tling pha tiin report chuan a sawi bawk a.
Wealth tax 1% lek lak pawhin India healthcare scheme lian ber National Health Mission chu kum 1.5 vel a dawl thei an ti bawk.
India mihausa tawntaw 100 te lakah 2.5% tax la se emaw top 10 Indian billinaire te lakah 5% tax la se chuan naupang maktaduai 150 te school chawl tawh te a kaltir leh thei ang tiin Oxfam chuan an tarlang bawk a ni.