India tan Artemis Accord pawimawh dawn

Prime Minister Narendra Modi an US a tlawha inremna a siam zinga pawimawh bera ngaih chu space lama inremna siam niin hei hi White House leh Indian Foreign Secretary te pawhin an sawi lan ve ve a ni.
India chuan US kaihhruaia kum 2025-a Thlaa mihring tirh leh tuma hmalakna Artemis Accords tihaah hming a ziah hnan a, space exploration lam niin, thla mai bakah Mars leh a dang te thlenga daidarh tumna a ni.
“India chuan ram dang 26 te zawmin Thla, Sikeisen leh a dang te daidar a nih theih nana hmalaknaah a hming a ziah hnan a. NASA chuan Indian Space Research Organization (ISRO) astronauts te training a pe dawn a ni,” tiin White House thuchhuah chuan a tarlang.
He Accords-in a tum ber chu sorkar tena Artemis programme hmanga thla leh a chhehvel awmze nei zawka daidar a nih theihna tur a ni ber a. Civil space activities te pawh huam vekin thla, sikeisen, comets, asteroids te bakah an surface leh sub-surface te bakah Thla leh Mars orbit te pawh zirchianna neih tur hian a huam tel vek a ni.
Awmze nei zawk leh chiang zawka kalpui tumna ni berin mihring in him zawka space an hman theihna tura ruahmanna a ni ber a.
Peaceful purpose atana hman tur niin heta tel ram tin te chuan thawkho leh tanghovin langtlang takin thil an kalpui a ngai thung dawn a. Astronauts tena harsatna an tawh pawhin Artemis a tel te chu inpuibawm tlang tura ngaih niin scientific data an neih te pawh khawvelin a hlawkpui theih nana tlangzarh zel tur an ni bawk.
Hei mai bakah hian Artemis a tel te chuan hmun pawimawh leh artefacts an lakkhawm te pawimawhna nei sang te chu an humhim a ngai dawn bawk a. Vansang chu leia ramiin a huam loh a nih avangin ram tin te chuan mawhphurhna lain space activity an neih tur te chu UN leh a space activity te hnenah leh an thawhpui ram te hnenah an hrilh zel tura tih a ni bawk a. Heng ramte hian ‘Safety Zones’ an siam a ngai dawn bawk a.
Inbakkaihna emaw thil duhawm lote a thlen loh nan Artemis a ram te chuan United Nations Committee on the Peaceful Uses of Outer Space (UNCOPUOS) in Space Debris Mitigation Guidelines a siam te chu an zawm a ngai bawk.
Artemis Accords-ah hian ram 26 ten hming an ziah hnan tawh a. Australia, Canada, Italy, Japan, Luxembourg, UAE, UK, leh USA te chu a dintu zingah an tel a, member thar zingah hian Rwanda leh Nifgeria te pawh an tel a ni.
NASA leh ISRO te chuan kum 2023 a thlaa intirh luh hman turin human spaceflight cooperation strategic framework ans iam mek a. He mi atan hian India chuan United States, Europe leh Japan te nena awm ze nei zawka thawhho theih nan Laser Interferometer Gravitational-Wave Observatory din nan $318 million a thehchhuak tawh bawk.