India tan bronze dang hmin leh

India tan bronze dang hmin leh
Nimin khan Indian shooter Swapnil Kusale chuan 50m rifle 3 positions event atangin Paris Olympics kal laiah bronze medal a hlawhchhuak ve leh a, he silai inkahsiak category bika India Olympic bronze hmasaber niin, he thu buatsaih lai thleng hian Paris Games 2024 kal laiah India chuan medal pathum, bronze hlir a khawl tling ve ta!
Kusale hi stage one-ah parukna ni daih mah se eight-shooter final-ah 451.4 aggregate hmangin pathumna dinhmun a hauh pha a, medal table-ah India buk a rih belh hlek!
Kum 28-a upa Kusale hma lawk hian Manu Bhaker chuan women’s 10m air pistol-a bronze a awrh bakah Sarabjot Singh nen tangdunin mixed team 10m air pistol bronze an lo sualchhuak tawh bawk.
Paris Games hma Olympic final round-a Indian 50m rifle shooter inlan hnuhnung ber chu 2012 London-a kan hmuh Joydeep Karmakar kha niin, 50m rifle prone event-ah medal dawng pha lo tawk chiahin palina a ni a, he discipline hi Olympic-ah an telh chhunzawm ta lo a ni.
India tana medal awrhtu hnuhnung ber ni rih Kusale hi cricket game khelh laia ticket collector thin niin, infiamna lama phurna leh thathona petu chu cricket icon MS Dhoni a nih thu a sawi.
Vawikhat chak chiah
Paris-a medal awrh thei turin Indian boxer Nishant Dev chuan vawikhat chak a la ngai a, last-eight round a hmabakah hian hnehna a chan leh chuan a lo berah bronze a hmin chiang tawh dawn.
Nilaini khan 71kg men’s boxing competition-ah Dev-a hian split decision (3-2)- Ecuador boxer Jose Gabriel Rodriguez Tenorio hnehin quarter-final a lut.