India tana ban elh tur Zuala

India tana ban elh tur Zuala
Tun thla ni 10 atanga Bulgaria-a World Arm Wrestling Chhampionship khel turah India aiawhin Lunglei College Veng tlangval Reuben Lalhmangaizuala a tel dawn.
Kar kalta khan Zuala hian Kolkota khuaah visa buaipuiin interview a hmachhawn a, Zirtawpni khan Lunglei a thleng leh tawh a, visa an nghak a, lo thleng thuai turah an ngai.
Lunglei atangin tun thla ni 8-ah Aizawl a pan ang a, Aizawlah ni hnih a cham ang.
Tun thla ni 10-ah Delhi panin a thlawk thla ang a, hemi ni vek hian Bulgaria a pan a; Istanbul-ah darkar 8 vel an chawl ang a, hemi hnu hian Bulgaria an pan ding nghal dawn a ni.
Reubena hi kut ding lam leh vei lamah a khel kawp dawn a ni.
Kolkota khuaa visa buaipuia a interview-naah Tuesday Nightmare-te hotel-ah a thleng a, ani hian ei leh in leh thlen man a lo free vek a, a chungah Lunglei District Arm Wrestling Association hruaitute an lawm hle.
Ono Lalawmpuia, Saikhamakawn a tel ve dawn a, ani hi kut vei lama khel tur a ni thung.
Reubena hian khawvelah champion turin theihna a nei tih Lunglei District Arm Wrestling Association hruaitute chuan an hmu.