India tlawhtu Venezuelan president leh Jaishankar inkawm

External Affairs Minister (EAM) S Jaishankar-a chuan Ningani khan Venezuela president lailawk, Delcy Rodriguez-i chu New Delhi-ah a kawm a, ram pahnihte thawhhona tihchakna tura a inpekna rinawm tak lawmawm a tih thu a sawi.
EAM chuan Rodriguez-i’n Prime Minister Narendra Modi a kawm lehna turin ram pahnihte thawhhona a tihchak lehzual ngei a beisei thu a sawi.
An inkawm zawhah Jaishankar-a chuan, “Vawiin khan Venezuela-a president nihna chelh lailawktu, Delcy Rodriguez-i chu New Delhi-ah ka kawm a, kan lawm hle a. Hun rei tak atang tawha India leh Venezuela inkara inpekna kan ngai pawimawh hle a. Prime Minister Narendra Modi-a nena an inhmuhnain kan thawhhona a tichak zual hle ang,” tiin X-ah a tar lang.
Rodriguez-i hi Modi-a nen an inkawm zui dawn a, India–Venezuela inlaichinna chi hrang hrang – energy security, sumdawnna leh investment, damdawi, damdawia inenkawlna, inkalpawhna leh renewable energy lama thawhhona tha zawk neih theihna tur hrang hrang an dap dawn a ni.
Rodriguez-i hian ni nga chhung India tlawh turin New Delhi a thleng a, hei hi ram pahnihte inlaichinna thuk zawka siam tumna a ni.
Ministry of External Affairs (MEA) chuan, “Venezuela president lailawk, Delcy Rodríguez chu New Delhi a thlen hian lawm takin kan lo hmuak a. A tlawh chhung hian Prime Minister Modi-a nen ram pahnih inbiakna a nei dawn a ni a, India–Venezuela inlaichinna a ti thuk lehzual ang a, ram pahnihte thawhhonaa chakna chu a tichak lehzual ang,” tiin X-ah a tar lang.
MEA tar lan danin Rodriguez-i zuitu Venezuelan palaite hian India-in technology leh industrya a theihnate hriatthiamna an neih theih nan leh thawhhona tur kawng hrang hrang an dap dawn ni.
“India hi Venezuela tan energy leh investment lamah thawhpui pawimawh tak a ni a. Indian PSU-te hian Venezuela-ah energy sector-ah investment lian tak tak an nei a, tihpun zelna tur kawng zawn an duh hle a ni,” tiin MEA chuan a tar lang
India leh Venezuela hian inlaichinna tha leh inpawh tak an nei a, hei hi energy sector-a thawhhona, sumdawnna leh khawvel chhim lam tana inpekna nen a kalkawp a. Intlawhna hian ram pahnihte inlaichinna a tichak lehzual dawn a, sector hrang hranga ram pahnihte inzawmna a thuk zawk dawn niin MEA hian a sawi.
Rodriguez-i hi January 5 khan Venezuela interim president atan lak luh a ni a, US-in South American ram hi luhchilhin President Nicolas Maduro-a leh a nupui a mansak a ni.