Indian Air Force hotu in heliport siam theihna en

Indian Air Force (IAF) Air Officer commanding -in- chief of Eastern Air Command Air Marshal SP Dharkar chu Mizoramah lokalin airport leh heliport siam theihna tur a thlithlai dawn a. Thawhlehni khan a hran ve ve in larsap leh chief minister a kawm.
Raj Bhavan-a larsap Dr Hari Babu Kambhampati a hmuhnaah Mizoram a rawn tlawh chhan leh a program te a hrilh a. Helai hmuna Indian Air Force hmalakna hrang hrang a sawipui bawk.
Chief minister Zoramthanga hi a pisaah hmu bawkin, civil leh Air Force lamten an inhmantawm theih airport leh heliport Mizorama din dan tur an sawi dun.
Indian Airforce Eastern Air Command hotulu berin a tlawh avangin chief minister hian lawmthu a hrilh a. Mizoram chhim lamah airport tha tak, civil leh Air Force lamten an hman tangkai theih tur awm se tha a tih thu Air Marshal hi a lo hrilh.
Air Marshal chuan Mizoram chu a vawikhat kalna a nih thu sawiin, tun tuma a rawn kal chhan ber chu India hmarchhak venhimna tihchak zel nana Mizorama airport tha heliport nei tel, helicopter engemawzat chhawp theih siamna tur hmunhma tha a awm leh awm loh enfiah a ni, tiin, chutiang tur hmunhma a awm a nih chuan theihtawp chhuaha tihhlawhtlin ngei a tum tur thu a hrilh.
Chief minister chuan chutiang atana hman theih tur hmunhma chu hmun hnihah an hual thu Air Marshal hi a lo hrilh a. A rang lama a bawhzui nghal tur thu Air Force hotu hian a sawi. Airport thar bakah ram venhimna atana hmalak tulna an sawi dun bawk.