Ranbir Kapoor, Anil Kapoor, Bobby Deol, Rashmika Mandanna leh Tripti Dimri te channa ‘Animal’ chuan India-ah cinema hall ticket hralhna atangin cheng vaibelchhe 202 lalut theiin, No.1 a ni. Hindi tawng bikin cheng vaibelchhe 170 lalutin, India-a opening weekend-a sum lakluh tamah ‘Jawan’ dawttu a ni.
‘Animal’ hi an tlangzarh hmain director Sandeep Reddy Vanga chuan film certificate ‘A’ pek a nih avangin box office lamah a chhiat phah ang em, tih zawhna a dawng hnem hle a, ani pawhin beisei dan a thiam bik lo a, mahse ‘A’ certificate an dawng chu lawmawm zawka a hriat thu a sawi a, tunah chuan ‘A’ certificate hian ticket hralhah nghawng a nei lo tih a rawn lang ta a ni.
Ranbir Kapoor tan he film hi a channa opening weekend a sum lalut hnem ber a la ni, nimin (Thawhtanni)-ah pawh khan cinema hall ticket hralhna atangin cheng vaibelchhe 30 vel lalut leh thei tura chhut lawk a ni bawk.
He action thriller film hi sumdawng hausa fapa, a chhungte nena inmil vak lo, a chhungten US-a lehkha zir tura an dah bo, a lehkha zir zo haw leh hnuah pawh la che fuh thei vak chuang lo, nupui a neih hnua a chhungte kalsana US-a pem ta, US-a a awm hlana a pa an thah thu hriaa, phuba la tura haw leh ta chanchin vel tarlanna a ni.
Indian box office-ah ‘Animal’ a No.1
Get real time updates directly on you device, subscribe now.