Indian football season \an hun October 25

Indian football season
tan hun October 25
Super Cup chu Indian football season thar tanna ni thinin, kuminah Indian top flight dinhmun a chiri a, Indian Super League khelh theih a nih dawn leh dawn loh a chian loh ruai reng hnuah season thar chu tan ngei a ni dawn a, Thawhlehnia All India Football Federation (AIFF) official pakhat chuan thla thar October ni 25-a season-opening Super Cup khelh a nih tur thu a sawi.
Goa lama khelh tur Super Cup-ah hian Odisha FC tih loh ISL club zawng zawngin an tel tur an tichiang tawh a; top flight club-te bakah hian I-League team pali – Inter Kashi, Real Kashmir, Gokulam Kerala FC leh Rajasthan United an chhuak ve bawk ang a, vawiinah virtual-in intum tur tihfel (draw) a ni ang.
Super Cup hi season kharna tournament ni thin mah se Indian football bahlah avangin kuminah a khelh hun an tidanglam ta a ni.
Tarlan tawh angin, AIFF hian Super Cup champion team chu 2026-27 season atan AFC Champions League 2 play-off khel thei turin a dah a, mahse, winning team hian Indian Club Licensing Regulations hnuaiah 2026-27 season atan Premier 1 License an neih phawt a ngai thung ang.
2024-25 champion nih manah FC Goa chuan tun season kal laiah hian ACL 2 play-offs khelin group stage an lut fel tawh a ni.
Tarlan tawh thin angin, kumin December thla hian ISL huaihawttu Football Sports Development Limited (FSDL) leh AIFF inkara hun rei tak awh contract chu a tawp dawn a, Supreme Court lamin AIFF constitution thar duan pawm a nih hma chuan pawl pahnih inkara contract thar ziah a khap a, ISL dinhmun a chiang lo hle hman.
Tunhnaiah Supreme Court-in constitution thar chu a pawm tak avangin Indian top flight pawh an tan thei dawn a, club football season thar hawnna tournament khelh hun a chiang ta phawt e.